Merca ta ofrece 50 miyon pa detencion di presidente Venezolano Nicolas Maduro

WASHINGTON - Fiscal General Pam Bondi diahuebs a anuncia un recompensa di 50 miyon dollar pa informacion cu lo conduci na detencion di presidente Venezolano Nicolás Maduro.

AUMENTO DI RECOMPENSA 

Departamento di Husticia y Departamento di Estado a anuncia e recompensa, un aumento di 25 miyon dollar. Merca a acusa Maduro di ta yuda cartelnan di droga y gangnan di caya, como tambe operando un regimen corupto y represivo.

ORGANISACION TERORISTA 

“Maduro ta usa organisacionnan terorista stranhero manera TdA (Tren de Aragua), Sinaloa y Cartel of the Suns (Cartel de Soles) pa trece violencia mortal pa nos pais,” Bondi a bisa den un mensahe di video. “E ta un di e traficantenan di narco mas grandi na mundo y un menasa pa nos seguridad nacional.”

REACCION DI AUTORIDAD VENEZOLANO

For di autoridadnan venezolano, Noticiacla a compronde cu ta mira esaki como otro locura, ya cu di un banda ta bisa cu no ta reconoce e presidente, y di otro banda kier ofrece placa pa detene e president cu lo no ta presidente realmente den wowo di Merca. Ademas, nan ta bisa cu na Venezuela, no tin problema, y tur cos ta trankil. “No tin protesta, no tin problema. Nos ta sigui dilanti”, e fuenta gubernamental a bisa Noticiacla, reaccionando riba e noticia.