Aeropuerto cu pasonan pa mehora e experiencia di e pasahero

ORANJESTAD – Aeropuerto di Aruba pa medio di Aruba Airport Authority N.V. (AAA) den su esfuerso pa continuamente mehora e experiencia di e pasahero na aeropuerto, a cuminsa y ta casi cla cu algun proyecto hopi interesante. Pa medio di un comunicado, nan a indica varios proyecto ambicioso cu nan a completa, ta completando of tin den planificacion. E ta varia di WIFI gratis, trabou riba e non U.S. Plaza , e tensiles (dak pafo) y e bañonan y mas.

WIFI GRATIS

E planificacion y instalacion di un sistema nobo y mehora di WiFi a cuminsa y lo keda cla na fin di e tercer kwartaal of mas prome. Esaki lo inclui WiFi gratis den areanan publico di e terminal di aeropuerto y lo permiti pasaheronan pa usa nan aparatonan personal pa conecta cu WiFi mientras cu nan ta pasa nan tempo na aeropuerto.  

NON U.S. PLAZA

E area entre e terminal di Non US check-in y e terminal di yegada, e asina yama “Non US Plaza”, ta den su fasenan final pa wordo completa. Esaki ta inclui muebles nobo pa asina e bishitantenan y esnan cu ta biaha por ta mas comodo y relaha ora di bishita aeropuerto. E experiencia di salida nobo y mehora ta inclui un muraya di despedida (pa saca potret) cu e logo di Aruba riba dje y un area di come nobo cu mas asiento disponibel pa crea un area comodo pa e bishitantenan por come algo hunto cu famia y amistadnan prome cu nan subi avion. Pasaheronan cu lo sali pa destinacionnan cu no ta Mericano lo disfruta di e mesun atmosfera relaha cu a wordo crea algun anja pasa pa pasaheronan cu ta biaha pa Merca. Adicionalmente, e extension di e proyecto pa pone tensilenan riba e area pa cana dilanti di e terminal tambe ta parti di e proyecto aki.

DRECHA E BAÑONAN

Actualmente e bañonan publico situa na gate 2, 6 y 8 den e area di salida ta den proceso pa wordo remodela y lo keda cla na final di e tercer cuartal di aña. Bañonan adicional na e gatenan lo wordo construi tambe entre gate 4 y 5 y ta wordo spera pa keda cla na final di aña.

RENOBACION Y EXPANSION DI LUGARNAN PA F&B

AAA hunto cu Airport Hospitality Industry N.V. (AHI) tin basta tempo ta traha hunto riba proyectonan pa renoba, expande y crea conceptonan nobo di F&B na aeropuerto. Esun mas recien ta e Segafredo nobo cu a wordo re aloca hunto cu Quiznos situa na gate B (remote gate). Mas plan a corto y largo plaso a keda determina den cooperacion cu AHI y lo resulta den renobacion di algun lugar mas di come y bebe, expansion di lugarnan nobo pa come y bebe y algun concepto nobo adicional pa mehora e calidad di servicio cu ta wordo brinda na e pasaheronan. A corto plaso AHI lo cuminsa renoba tur 2 VIP lounge cu ta situa na gate 2 y 8 na salida. E renobacion lo ensera expansion di e areanan, remodelacion di e interior y drecha e mobilario completo di e VIP lounge. E proyecto aki lo percura pa un VIP lounge nobo y fresco y lo brinda facilidadnan cu lo complace e biaheronan VIP. Tur 2 VIP lounge lo keda cla pa fin di Juli 2015. Tin mas cambio andando den e area principal di concesion cu expansion di Haya Sushi; cambio di e lugar unda antes Haya Sushi tabata situa lo bira un concepto di F&B saludable yama “Freshii”; 2 kiosco di koffie lo wordo añadi na e opcionnan completo pa asina ofrese mas opcion pa nos pasaheronan den e area di concesion principal y tambe na gate 1 y 2; e area actual na gate 7 (Binah Coffee Shop) lo wordo cambia den un unidad di Juan Valdez cu lo ofrece tanto koffie, otro bebida y cos di come. Un area di aproximadamente 400 m² lo wordo desaroya y construi door di tanto AAA y AHI entre gatenan 4 y 5 y lo ensera 3 concepto di F&B nobo acerca: Un concepto di champagne/wine bar, un concepto di cuminda saludable (Freshii) y un concepto Asiatico, incluyendo un area adicional di asiento cu e capacidad pa 100-150 asiento. E area aki ta plania pa keda cla Durant e prome cuartal di 2016.

EXPECTATIVA

“E expectativa di pasaheronan pa e servicionan na aeropuerto ta keda cambia, y nos compromiso ta pa keda complace e expectativanan ei. Mientras cu nos ta traha pa streamline e procesonan di pasahero y haci e aeropuerto mas facil pa navega over di tempo, nos ta traha den colaboracion cu nos partnernan pa brinda e servicionan y facilidadnan cu pasaheronan ta spera y brinda un experiencia di clase mundial pa e bishitantenan di Aruba” asina Sr. James Fazio, CEO di Aruba Airport Authority N.V. a bisa.