Proyecto di Hospital 23.5% cla den construccion y inversion

ORANJESTAD – E Proyecto di expancion y construccion di Hospital Horacio Oduber actualmente ta na 23.5% den construccion y inversion. Stichting Onroerend Goed Aruba (SOGA), cu ta maneha pa Aruba Investment Bank (AIB), recientemente a cuminsa invita gruponan di interes pa sesionnan di informacion, incluyendo un recorido di e area unda construccion ta tumando luga na Dr. Horacio E. Oduber Hospitaal. Specificamente ta trata aki di e facilidadnan bao construccion cu ta parti di e proyecto di expansion y renobacion di e institucion medico.

INSPECCION DI E TRABOUNAN

Na juni SOGA a ricibi e prome grupo cu tabata e representantenan di e financiadonan y banconan envolvi den e proyecto, como tambe miembronan di Parlamento di Aruba. Diahuebs a ricibi Minister President mr. Mike Eman y Minister di Salud dr. Alex Schwengle pa un sesion di informacion, cu  a inclui un splicacion di e cuadro financiero tambe. E mandatarionan a ricibi un “update” completo di e progreso y desaroyo di e proyecto y despues a subi e tereno di construccion.

AIB

Director di AIB-Bank, Frendsel Giel a splica cu ta organisando e sesionnan aki pa mantene transparencia y e comunicacion pa cu comunidad y tur stakeholder. El a remarca cu den transcurso di e seis simannan entre e prome y e di dos presentacion, por a nota cu e proyecto ta mustrando un progreso grandi.

ON SCHEDULE

E proyecto ta “on target” financieramente y “on schedule” pa cu e progreso di construccion y no ta spera ningun cambio den e desaroyonan aki tampoco. SOGA ta mantene un control estricto riba e parti financiero y tin un “steering committee” encarga cu e supervision completo. Ademas, tin bon coordinacion di e proyecto, cu reunionnan mensual entre e contratistanan y tur partido envolvi.

PROYECCION VIGENTE

Frendsel Giel a bisa cu e proyeccion ta keda vigente: E Medical Office Building (MOB) ta cla na februari 2016 y e Bedtower y Emergency Department (cambernan pa pashent y departamento di emergencia) na october 2016. Construccion di e “Central Energy Plant” lo ta cla pa juli 2016. Asina cu caba cu e dos edificionan, lo cuminsa cu renobacion di e edificio existente. Esey lo dura dos aña y lo ta cla na juli 2018.

KEDANDO CLA?

E proyecto di renobacion y expansion di Dr. Horacio E. Oduber Hospitaal ta 23.5% cla. Entre e dos sub contratistanan local, esta Bohama y Albo, tin 98 trahado local trahando riba e proyecto y e contratista Arellano tin seis trahado for di exterior den su team.