Apelacion de Meza contra Ministerio Publico ta awe!

ORANJESTAD – Despues cu pa motibo technico, mester a pospone e caso di apelacion di Mike de Meza contra Ministerio Publico, e caso ta tuma lugar awor awe 5 di augustus pa 2’or di merdia, tras di porta cera. No obstante e hecho cu e ta tras di porta cera, a nota cu via rednan social, e parti di De Meza a pidi fanaticonan di de Meza pa bin mustra sosten fisicamente na de Meza.  

CASO POSPONI

Tabata dialuna anochi siman pasa cu Noticiacla a raporta den forma di primica, cu e caso di Corte di apelacion cu mester a tuma lugar diamars 29 di juli 2025 di Parlamentario Mike de Meza contra Ministerio Publico, a keda posponi ‘te proximo aviso’. Dialuna anochi abogado mr Desiree Croes a haya e notificacion, cu debi na problemanan technico na Corte, mester a pospone e caso te proximo aviso. Lo duna un fecha nobo awor pa e caso tuma lugar.  

KICO TA EXIGI

Pa loke ta e caso, manera cu Noticiacla a informa dialuna mainta caba, segun abogado Croes, e tin dos punto den e caso di apelacion. E prome, ta pa Ministerio Publico laga sa exactamente kico ta e acusacion cu tin contra su cliente(no solamente un articulo) pa cual ta considere actualmente un sospechoso. Esaki, pasobra segun Croes, e huez na prome instante a dicta cu ‘⁠referencia (verwijzing) na un articulo ta suficiente y cla (duidelijk genoeg)’ ;Y tambe pa duna fecha pa dicidi si tin suficiente prueba pa persigui de Meza si of no (vervolgingsbeslissing). Esaki pasobra aki e huez na prome instante a dicta cu pa pidi fecha pa tuma un decision pa persigui de Meza (vervolginsbeslissing) ta prematuro. E huez cu a dicta e sentencia aki, tabata e mes huez cu a dicidi e prome biaha, dus segun Croes, ta logico cu e lo keda riba su desicion. Awor tres diferente huez hunto, lo tin cu dicidi si e huez den prome instante tabatin razon of no, of dicidi otro. 

BIRA MINISTER

Tur e puntonan ta cu e meta principal pa libera de Meza di e cargonan y barera, pa asina finalmente e por bira minister di e gabinete AVP-FUTURO. Cu e bista aki, prome minister Eman a apunta un minister temporal pa e funcion cu de Meza lo mester a haya. Sr Rene Herde a keda apunta pa e funcion, te ora cu e asunto di de Meza keda clarifica. Y cu esaki, ta e intencion di e abogado pa libera tur e obstaculonan, y cu kier haya fecha specifico, pa no tarda e asunto mas. Noticiacla lo tin e raportahe despues di e proceso di e caso awe.