Gobierno a confirma cu Bank Transfer Levy ta ‘riba mesa’ ainda

ORANJESTAD – E plan di gobierno pa introduci e asina yama ‘Bank Transfer levy’ pa genera fondo, ta riba mesa ainda. Esey e mandatario di economia, Mike de Meza, a declara na prensa diaranson durante su bishita na waf di Barcadera. Segun e mandatario, no a caba cu e estudio di e implementacion di e ley, y cu asina cu ta cla, lo duna mas informacion. Esey ta nifica pues, cu e ta riba mesa ainda, no obstante e obhecion di entre otro e asociacion bankero y otro gremionan.

MOTIBO PA E TAX

E intencion, segun de Meza, ta pa e fondo cu e tax aki genera, bay pa reemplazo di loke awe nos conoce como Fondo Desaroyo Aruba. Segun de Meza, ‘e Transfer Tax lo por ta e concepto adecuado pa esaki’. E mandatario a confirma tambe cu e la reuni caba cu dos gremio, AHATA y ATIA, pero tin cu sinta na mesa cu demas gremionan pa asina ‘discuti e necesidad y importancia di e ley y su significacion pa Aruba’.

BERMUDEZ

Tabata minister di finanza Angel Bermudez cu prome a papia di e tax aki, y a yame un Bank Transfer Levy. Loke e ta, ta un cobransa riba cualkier cuenta debit of credit bancario cu tuma lugar. Ora cu e mandatario a informa di e tax aki, banconan mesora a protesta y mustra cu nan no ta para tras di e idea aki, ya cu e ta manca operacion di banco.

ASOCIACION DI BANCONAN

Durante un conferencia di prensa di e asociacion di banconan na Aruba, a sali afo atrobe y bisa mas specifico cu introduccion di e levy aki, lo nifica cu hendenan no ta bay banco mas. Nan ta prefera di ‘pone e placa bou di nan matras’, enves di pone na banco ya cu nan lo wordo cobra pa cada transaccion cu nan haci na e banco(nan). Y como tal, esaki ta pone e banconan den un situacion fastioso.

PROME MENCION

NoticiaCla.com a tende di e asunto aki prome aña pasa, y unda cu minister Bermudez a bisa e tempo ey, cu e intencion tabata pa haci e estudionan necesario pa por introduci esaki. Pero cu mes momento, no tabatin pensa di introduci esaki sino te na juni/juli di 2015. Pues aworaki. Sinembargo no a tende nada mas te cu awor, cu e mandatario di economia (y no di finanza) a dicidi di papia riba e tema atrobe. Pa basta tempo NoticiaCla.com tabata acerca e mandatario di finanza mirando cu ta el a bin cu e tema. Pero diripiente e la cuminsa referi e caso na minister di economia, colega de Meza. Den su declaracion na otro prensa diaranson, de Meza no a duna un indicacion di pa ki tempo por spera un decision fiho di gobierno riba e introduccion di e tax aki, of no.