Plasterk: Aruba y Hulanda papiando riba deadline ley AFT

DEN HAAG – “Gobierno di Aruba y Hulanda ta papiando aworaki riba e ‘deadline’ (di 1 di augustus) y e conseho (ricibi di Raad van Advies riba e Landsverordening Aruba Toezicht)”. Asina vocero di minister Ronald Plasterk, Julia Rademaker a confirma na NoticiaCla.com awe mainta. E no por a bisa si esaki ta nifica cu Hulanda ta considerando pa extende e deadline pa introduccion di e ley pa instala e colegio di supervision financiero CAFT pa despues di 1 di augustus. Of si e ta mantene su posicion firme, esta cu Aruba no por pasa e fecha di 1 di augustus. Segun protocol firma dia 2 di mei, Aruba tabatin te 1 di augustus pa keda cla cu introduccion di e ley aki. Pero tardansa a pone cu e fecha ey no tabata mustra mucho factible. 

CONFIRMACION RETRASO

Ta despues cu gobierno a admiti diaranson cu no ta bay keda cla na tempo cu e tratamento di e ley AFT, NoticiaCla.com a tuma contacto cu gobierno di Hulanda, pa haya nan reaccion riba e asunto aki. Apenas un siman y mey pasa, a compronde cu Hulanda a para ariba cu no ta cambia e fecha, y cu ta tene Aruba na su palabra, ‘cu a priminti di lo cumpli’ cu e fecha. “Y nos ta tene Aruba na e declaracion ey”, Hulanda a bisa e momento ey na NoticiaCla.com.

REACCION GOBIERNO ARUBA

Tabata ayera cu prome minister Mike Eman (na 24ora.com)  durante su bishita di inspeccion na waf di Barcadera, y despues tambe minister di finanza Angel Bermudez (na NoticiaCla.com) a confirma cu gobierno di Aruba ‘no ta logra keda cla cu e ley prome cu 1 di augustus’. Serca NoticiaCla.com, Bermudez a bisa cu no tin problema pa pasa e ley, despues di e fecha menciona pasobra e lo drenta na funcion cu forza retroactivo. A haci e mandatario e pregunta specifico “No tin pura pa pasa Aruba Financieel Toezicht (AFT) mas, pasobra e ta drenta na vigor cu forza retroactivo”, e mandatario a contesta “esey ta factibel!”. E pregunta a bin a base di un declaracion anterior di e mandatario, splicando pakico no tin pura mas. Ta resulta cu e mandatario a bisa mas prome,- den un declaracion anterior-, cu e ley por wordo implementa cu forza retroactivo te 1 di augustus. Pues como tal, no tin pura mas.Eman a declara cu e conseho di Raad van Advies dialuna riba e tema, a pone nan reconsidera y mira cu enberdad no por keda cla prome cu e fecha ey. Y como tal, no ta bay ‘torno’ na e recess di parlamento manera cu kier a haci inicialmente.