Reunion awe mainta ta determina si accion Elmar ta stop

ORANJESTAD – E trahadonan ‘staf’ di NV Elmar lo keda den accion te ora cu nan tende algo ‘positivo’ diahuebs mainta for di e reunion cu mediado pa 11’or di mainta. Mediador di gobierno Anselmo Pontilius a confirma na NoticiaCla.com diaranson atardi, cu e reunion cu e staf y nan sindicato Alvast a bay bon. Pero ta e reunion di diahuebs mainta laat lo ta determinante. “Mientrastanto e trahadonan ta keda den accion”, Pontilius a sigui bisa.

REUNION CU MEDIADOR

Despues cu mas prome mainta diaranson, e grupo di 28 trahado cu ta ‘staf’ a dicidi di protesta, a dicidi cu ta reuni cu mediado di gobierno diaranson atardi 3’or. Aki e mediado a presenta un protocol cu puntonan cu e sindicato por a ‘biba’ cune. Sinembargo kier a pasa esaki pa e abogado di e sindicato, y tambe presenta e plan na e trahadonan diahuebs mainta 7’or pa wak si nan ta acepta e contenido di e protocol. Si esey ta e caso, y e reunion mas despues 11’or bay bon, lo tin un periodo di un luna durante cual lo traha riba e diferencianan y purba logra yega na otro. Durante e periodo ey, lo no por tin accion.

E PROBLEMA

E problema segun representante di e sindicato ALVAST, Raymond Maduro a bisa NoticiaCla.com , ta cambionan cu gerencia kier a implementa riba e maneho di Sociale Verzekerings Bank, unda cu kier cambia cierto procedura. E hecho cu gerencia kier a haci esaki unilateralmente ta loke cu e trahadonan no a gusta y e sindicato menos. “Diferente occasion a busca pa yega na un entendimento cu otro” Maduro a bisa. Pero no a logra. E deal cu gerencia a sera cu SVB, no ta esun miho y como tal e sindicato a protesta. Mientras cu tin un maneho berdad, ta na mesa ta haya otro y tin cu respeta esaki. “Loke cu nan a sera cu SVB, nos mester sigui a ‘pie de la letra’” Maduro a bisa. A mustra cu ta willing pa yega na un solucion, pero gerencia ta sigui insisti cu ta solamente mester ‘notifica y dal bay’, pero sindicato no kier tende di esey. E grupo cu tabata protesta, no mester afecta e comunidad aunke cu a confirma diaranson cu a entrega e autonan di compania y e yabinan, pues no ta bay traha riba caya durante e accion. “Si algo grandi pasa, hefenan no ta sali pe. E parti di e chefnan mas ariba, lo tin cu actua” Maduro a sigui bisa.