Ministernan a inspecciona trabounan na waf di Barcadera

ORANJESTAD – Ministernan Eman y de Meza diaranson a bishita e waf ‘nobo’ na Barcadera pa pone nan mes altanto di e progreso di e trabounan. Aki a nota e.o. cu piezanan di e grua nobo pa e waf di carga na Barcadera a yega, y a wordo baha di barco y e trabounan pa arma y instala ya ta andando.

YEGADA DI E GANTRY

Anko Koopmans, Development Manager di ASTEC, -e compania cu ta bai maneha e parti di waf-, a splica e mandatarionan tocante yegada di e Paceco Gantry Crane for di Bilbao, Spaña. Ta trata di piezanan pre fabrica cu ta forma un grua di 50 ton y cu ta bay tuma e siguiente cuater lunanan pa arma. E ta casi mesun grandi cu esun cu tabatin na waf di Oranjestad, pero hopi mas nobo y moderno den su sistema di operacion.

IMPACTO DI E WAF

Adicional na e grua, Eman a combersa riba e impacto cu ya for di awo e waf nobo di carga ta generando y ta duna un perspectiva hopi positivo pa su operacion y aporte na economia di nos isla. “Tin empresa caba rond di desaroyo di waf cu kier traha riba e boeinan grandi cu ta wordo uza pa pone espacio entre barconan grandi cu nan kier bin desaroya y pone nan riba e tereno grandi aki; jachthaven cu ta busca containerhaven pa por lanta yatenan grandi for di lama, kier men un cantidad di actividad adicional cu ta bin cu e containerhaven nobo aki.”