Ex general Carvajal presenta dilanti Procurador General

ORANJESTAD - Destino di e ex general Hugo "El Pollo" Carvajal ta den man di un huez, cu tin cu dicidi si por extradita Carvajal pa Merca of no. Mes momento e abogado di Carvajal, conocido abogadonan Chris Lejuez y Vinda de Souza a presenta diahuebs atardi den e edificio di Centro di Husticia mes na Macuarima. Ta trata e 'voorgeleiding' dilanti Procurador General, cu tabata Peter Blanken. Enbes di traslada e ex general pa edificio di corte, a opta pa tene tur cos na e edificio na Macuarima mes unda cu Carvajal ta deteni. Riba e fotonan di NoticiaCla por mira momento cu PG Blanken y abogadonan  Lejuez y de Souza ta bandona e edificio. Tambe personal diplomatico di consulado Venezuela cu tabata presente na e edificio. 

Mientrastanto for di medionan venezolanto tin informacion cu gobierno venezolano ta exigi libertad inmediato di e diplomatico Hugo Carvajal, na gobierno di Reino Hulandes y ta rechasa su detencion. Gobierno venezolano a haci un yamada fuerte segun e corant El Nacional, pa gobierno di Reino rectifica e hecho di ‘encarselacion inhusto’ di nan diplomatico. Si no haci esaki, e por danja relacion diplomatico, economico, energetico y comercial actual entre Aruba (Reino Hulandes) y Venezuela. Momento cu gobierno di Venezuela a tende di e detencion, (cu nan ta yama illegal) atravez di e canciyeria, a activa tur mecanismo diplomatico pa coregi e loke nan ta yama ‘violacion di derecho internacional.’. Manera cu NoticiaCla a raporta caba, for di diahuebs mainta, un vice minister y otro diplomaticonan a yega Aruba pa pone nan mes na altura di e situacion actual di Carvajal.

Despues cu diaranson nochi Hugo "El Pollo" Carvajal Barrios a keda deteni ora cu e la drenta Aruba, NoticiaCla, e informacion cu autoridad hudicial di Aruba y Merca tabatin intencion pa extradita e persona aki diahuebs mainta mes. Ora cu e la drenta Aruba diaranson anochi, autoridad a gare cu 9.000 dollar. Mesora a sere na Centro di Husticia unda cu polis tabatin ordo pa vigila esaki extra pa evita cu nan por a sake afo den oranan di marduga. Mei anochi su abogado Chris Lejuez a reuni cune, y lo ta esun purbando di bringa su extradicion. Carvajal, un ex militar retira cu a wordo sanciona pa Merca pa supuesto colaboracion cu actividadnan di narcotrafico di guerrilla di Farc, a wordo designa algun tempo atras como consul general di Aruba.