METEO: Ta spera biento fuerte pa Aruba riba diahuebs

ORANJESTAD – Biento na Aruba lo conoce un aumento fuerte diahuebs. Por lo menos segun pronostico di servicio meteorologico di Aruba. Ta papia di forza 20 pa 37 km cu rafaga di 43 pa 65 km pa ora. Mes momento ta papia di chens pa un yobida local pero nada grandi. E cantidad di awacero cu a cay den e ultimo 24 ora tabata bastante, registra na 16.4 mm na aeropuerto.

TEMPO MES

E tempo mes lo ta parcialmente nubla cu chens pa algun yobidanan isola principalmente parti mainta. E situacion general ta cu un ola tropical lo traslada den nos regio diahuebs marduga. Esaki por aumenta e humedad y causa un yobida local, masque ta parse cu mayoria di yobida lo keda riba lama.

RESTO DI SIMAN

Pa loke ta e prospecto di tempo pa e resto di siman, esaki lo ta parcialmente te levemente nubla. Biento ta keda fresco te fuerte y temperatura ta fluctua rond normal. Despues di diahuebs stof di Sahara por crusa nos area.