Ta bay haci 2 siman cu e cuater piscadornan Arubiano a perde riba laman

ORANJESTAD – Aki dos dia ta haci dos siman cu e 4 piscadornan Arubiano Davey Croes, Jarred Croes, Aishell Tromp, y Marcelo Heyden a perde riba laman y cu a cuminsa un buskeda rigoroso pa nan. Mientras cu no a tende nada mas concreto di e buskeda, e pregunta cu ta surgi ta, ki ora ta stop cu e buskeda y ta declara e piscadornan oficialmente ‘perdi’ of mas pio, fayeci. Esaki ta un tema dificil, sigur. Pero for di autoridad competente, noticiacla a compronde cu nada no a cambia y cu manera nan a informa for di siman pasa diahuebs, cu a entrega e buskeda den man di Colombia, esaki ta sigui vigente.

E DILEMA PA DICIDI

Noticiacla, tumando contacto cu varios instancia cu ta of tabata envolvi, cu e no ta un situacion facil. Entre nan, cu tin falta informacion di p.e. e boto, y di e tripulantenan. Tin hopi scenario y suposicion, manera cu e boto a sink, e coriente a hiba e boto ariba (rumbo Santo Domingo) enbez di pabou (Colombia of Panama), etc etc. Pero a compronde cu tanten cu no haya algo concreto manera material di e boto, of di e tripulantenan, tur cos ta keda habri. Sin e puntonan menciona, tur posibilidad (aunke remoto y limita) ta keda posibel y habri pues.

KI ORA UN RESCATE TA BIRA UN MISION DI RECUPERACION

Loke hopi ta puntra, ta kico ta pasa despues. Internacionalmente, segun informacion cu Noticiacla a logra compila, manera di e.o. The Drowning Accident Rescue Team (DART) cu ta un organisacion boluntario na Merca, ta bisa cu den un situacion di rescate den awa, e transicion di un buskeda y reskate (SAR) pa un mision di buskeda y recuperacion ta sosode ora e probabilidad di haña un victima of victimanan bibo, disminui, y e enfoke ta cambia pa localisa y recupera un individuo(nan) defunto. E cambio aki hopi biaha ta wordo determina pa factornan manera e tempo cu a transcuri desde cu e persona(nan) a wordo mira pa ultimo biaha, e condicion di e víctima, y e complexidad di e ambiente di rescate.

BUSKEDA Y RESCATE (SAR):

E fase aki ta priorisa pa localisa y rescata un persona bibo. E ta encera un esfuerso consentra pa haña e individuo mientras cu e ta potencialmente na bida ainda, hopi biaha denter di un periodo di tempo specífico conoci como e “ora di oro”.

TRANSICION PA RECUPERACION:

Ora bira cla cu e persona(nan) probablemente ta defunto, e mision ta transiciona pa un operacion di recuperacion. E cambio aki ta reconoce e chens reduci di sobrebibencia y ta priorisa e recuperacion di e curpa.

FACTORNAN CU TA INFLUENCIA E TRANSICION:

Tempu transcuri: Mas largo un persona ta sumergi, specialmente den awa friu, mas abou e chensnan di sobrebibi, loke ta causa un transicion pa recuperacion.

Condicion di e Victima(nan): Si e victima(nan) ta observa pa ta inconciente of no ta reaciona pa un periodo largo, esey por indica cu nan ta defunto, loke ta causa un esfuerso di recuperacion.

Complexidad di e Rescate: Si e ambiente ta particularmente peligroso of esfuersonan di rescate ta resulta inecitoso, e analisis di riesgo-beneficio por faborece recuperacion riba esfuersonan di rescate continuo.

MODO DI RECUPERACION:

Den e modo di recuperacion, e enfoke ta cambia pa recohe evidencia y e recuperacion safe di e curpa(nan). Evaluacion di riesgo ta bira un factor principal, y e urgencia di e operacion por wordo reduci.

IMPORTANCIA DI EVALUACION DI RIESGO:

Durante tanto e operacionnan di SAR como di recuperacion, evaluacion di riesgo cuidadoso ta crucial pa garantisa e seguridad di e personal di rescate. Den recuperacion, e enfoke ta riba recupera e curpa(nan) na un manera sigur, hasta si esey ta nifica tuma mas tempo of usa diferente metodo. Tur esaki ta informacion general, cu organisacionan ta usa pa basa nan mes ariba, y cu Noticiacla tambe a consulta pa e articulo aki.