Abehanan cu agresividad na Corsou awor ta matando cacho y pahra

WILLEMSTAD - Otro kaso di abeha furioso i den e kaso akí a pika un kachó i un para i kousa nan morto. Ta siman pasá tabatin un kaso di abehanan furioso ku a pika un hòmber i kousa su morto den área di Fuik. E kaso awor akí tambe ta djis den serkania kaminda e abehanan a ataka e víktima. Den oranan di mainta ayera djamars 22 di yüli 2025, polis a keda dirigí na Katoentuin, kaminda abeha a pika i mata un kachó i un akamaya.

E abehanan a traha nan nèshi den un pos ku tabata kompletamente tapá den kurá di un kas.

Na Seru Machu i tambe den Stakamahachiweg i Kaya Agrikultura den oranan di mainta a konstatá nèshinan di abeha den palu ku a kuminsá ataká abitantenan.

Polisnan di warda di Montaña tabatin kontakto ku un ‘Imker’ i esaki a indiká na nan, ku den e último tres simannan a konstatá ya un kantidat di kuater (4) kaso di atake di abeha fatal kaminda sea un persona òf animal(nan) doméstiko ta pèrdè nan bida.

Segun e ‘Imker’ no ta trata aki di situashon di abeha normal, esta di abehanan krioyo ku nos konosé na Kòrsou. Ta trata di abehanan ku un agresividat no kustumbrá i tin asta krusamentu di reina òf eksperimentonan ku ta keda hasí pa krea espesienan nobo. A resultá ku humamentu di e abehanan aki no ta kalma nan.

Mirando loke e eksperto a indiká, Kuerpo Polisial ta atvertí tur persona ku na momentu ku bo mester nota presensia di abeha den bo besindario, pa bandoná e sitio mesora i yama polis.

Si bo ta na kas, drenta paden i hinka bo animal(nan) doméstiko den kas, te na momentu ku e situashon ta seif pa sali pafó.

Finalmente e ‘Imker’ a duna di konosé ku en bista ku nos área ta bèrdè, tin sufisiente flor pa e abeha i no ta spera ku nan lo ta bou di situashon di strès. NOTA: Texto ta scirbi den papiamento fonetico di Corsou.