Colombia no a raporta mas riba e cuater piscadornan cu ta perdi riba laman

ORANJESTAD – Cinco dia despues cu Wardacosta di Caribe Hulandes a entrega e caso di buskeda di e cuater piscadornan Arubiano perdi, den man di Wardacosta di Colombia, no tin mas noticia di e caso. “Nos no a tende nada mas” Miguel Perret Gentil a bisa Noticiacla diamars mainta. Desde cu a entrega e caso na Colombia, nada no a cambia di e informacion cu nan (Aruba) a suministra na prensa diahuebs ultimo. Pero Perret Gentil a sigura cu e buskeda ta continua y cu di parti di Aruba, ta sigui tira bista. Pa loke ta atencion mediatico, esaki a bira menos den medionan di comunicacion, pero ta keda hopi activo riba rednan social.

COLOMBIA

Diasabra ultimo a haci un siman cu e 4 piscadornan a sali pisca y no a bin bek. E buskeda mas intenso monta pa autoridad Hulandes/Arubano, no a produci nada nada den e siman ey. Y tabata diahuebs siman pasa cu autoridad di Wardacosta di Caribe Hulandes mester a entrega e buskeda den man di autoridad di Colombia, debi cu e buskeda a mobilisa su mes completamente den nan teritorio. Y no por a haci nada otro cu laga esaki den e man di e colombianonan. Y a keda cu si haya algo y of tende algo, lo comunica cu autoridadnan di Aruba. Pero te cu awe diamars, esaki no a sosode. Pues si no tin nada, no ta raporta nada. Y esey kier men e ora cu autoridad Colombiano no a haya nada. Cu si nan a stop e buskeda, no ta conoci. 

CHENS PA SOBREVIVENCIA

For di expertonan di laman cu a papia cu Noticiacla, por a compronde cu mas dia pasa, ta logico cu mas chikito e chens ta cu lo por haya e cuater piscadornan na bida. Papiando cu varios piscado cu ta experencia, ta bisa cu e chensnan ta hopi chikito cu aworaki, na e momento aki, lo por haya algo positivo di nan. E chens pa haya nan, tabata e prome dos dianan, dependiendo di e situacion. A splica hopi scenario. Entre nan, cu depende kico a pasa, cu nan a haya chens pa ekipa nan mes cu p.e. e material di rescate, salbabida y ekipo di comunicacion. Si por ehempel, e boto a sink, y nan tabatin tempo suficiente pa usa tur e ekiponan necesario, nan lo por a sobrevivi algun dia riba laman. Pero ni esey aworaki, no ta mustra viable, mirando cuanto dia a pasa. Pero si nan situacion tabata di tal forma cu a gara nan pa sorpresa, y cu p.e. e boto a sink hopi lihe (a splica cu e boto por sink den 3 minuut), nan no a haya chens pa prepara nan mes y gara loke nan tabatin mester pa por sobrevivi sin e boto. A compronde cu e boto tabata ekipa cu varios radio y salbabida etc, pero cu nada no a wordo haya. Algo hopi straño, cu ta splica cu algo lo a pasa repentinamente cu a stroba nan di prepara pa esaki. Tur e teorianan aki, ta bin di piscadornan experencia cu cual noticiacla a papia cu ne. Un posibilidad remoto, ta cu piratanan sea colombiano of venezolano por a secuestra nan y tin nan wanta. Of autoridad Venezolano a gara nan y cu nan ta deteni na Venezuela. Esaki aunke negativo, por nifica si, cu por lo menos nan ta na bida. 

SPERANSA

E loke ta ultimo cu bo ta perde ta speransa. Y  tin hopi cu ta carga speransa y ta spera riba un milager, cu por haya algo, maske ta un señal, cu e cuater piscadornan aki ta na bida, y cu por localisa nan den un forma cu ningun hende ta pensa. Dios spaar e piscadornan aki, y forza pa nan famianan.