DBB: Ta conseha pa no biaha pa Venezuela bou ningun circumstancia

ORANJESTAD – Gobierno di Aruba a ricibi notificacion for di Ministerio di Asuntonan exterior di Reino Hulandes cu conseho di biahe pa Venezuela lo cambia di codigo oraño pa codigo cora, entrante awe diabierna 18 di juli 2025. E cambio aki ta aplica pa tur hende cu tin pasaporte Hulandes. Esaki ta nifica cu ta conseha firmemente pa no biaha pa Venezuela bou di ningun circumstancia, sin excepcion. No ta bisa si, kico a sosode aworaki cu a agrava e situacion di tal indole cu mester a cambia e codigo entrante awe. Solamente cu e situacion den e pais ta instabil y por presenta un riesgo serio pa tur bishitante stranhero, incluyendo pa persona cu nacionalidad Hulandes. 

VARIOS INCIDENTE

Mientras cu no tin cosnan concreto cu a sosode, ta papia solamente di ‘diferente incidente’ cu a tuma lugar na Venezuela, incluyendo detencion sin motibo cla, di ciudadano stranhero. “Seguridad ta limita y no por garantisa asistencia consular den caso di incidente of emergencia”. Tambe ta asina cu mayoria di compania di seguro no ta cubri pa accidente of incidente den caso di un conseho di biahe cora, cual ta  forma un riesgo adicional.  Esnan cu toch kier biaha, ta recomenda pa nan registra nan mes via di e siguiente link https://informatieservice.nederlandwereldwijd.nl/.