Tjin-Asjoe: Aruba no kier atrae turista cu ta campa pa falta di placa

ORANJESTAD – Aruba no kier e tipo di turistanan cu ta campa na e.o. Linear Park pa ‘falta di placa’. “Esey no ta e tipo di turista cu Aruba kier atrae” CEO di Aruba Tourism Authority Ronella Tjin-Asjoe a bisa NoticiaCla.com awe mainta. E ta reacciona riba e noticia cu un grupo chikito di turista venezolano tabata campando bou di mata na Linear Park, pasobra ‘placa a caba cu nan’. Mes momento, Tjin-Asjoe ta mustra cu nan no por controla e tipo di turista ey di bin Aruba. “Esey ta fuera di nos control”.

TIPO DI TURISMO VENEZOLANO

E ehecutivo halto di oficina di turismo di Aruba a mustra cu lamentablemente e grupo aki tambe ta forma parti di e ‘turismo’ di Venezuela, y ta cay bou di un di e tres gruponan cu nan ta hayando di e pais bisiña. E prome grupo ta esun cu ta gasta bon, tin hopi placa y ta gasta ‘sin limite’. Esey ta e turismo cu Aruba ta bringa pe y ta mercadea. Banda di esey tin e grupo cu ta bin pa uza Aruba como hub, y sigui pa otro destinacion. Cu suerte, nan lo bin Aruba pa keda, y tambe sa laga placa aki aya. Y finalmente tin e turista venezolano cu ta bin riba un presupuesto hopi chikito, y cu ta gasta pues minimal. Nan ta esnan cu ta bin sea pa raspa (saca placa for di ATM) y bolbe nan pais, of ta bin, cumpra combustibles y bolbe nan pais. Y tin esnan cu ta bin keda lo minimo debi cu nan ta wordo restringi pa e instancia financiero di nan pais.

GRUPO TA HALA ATENCION

Ta e grupo aki ta esun sinembargo cu ta hayando mas atencion y cu ta pone e turistanan venezolano den mal luz. Y ayera atrobe esaki a bira e caso ora cu polis mester a interveni y hiba e turistanan aki na IASA unda cu a atende cu nan manera mester ta.

MAS CONTROL

Segun e ehecutivo di turismo, e kier ta bon cla cu ningun momento kier pa e turista ey, bin Aruba. Pa evita esaki, aunke no por haci hopi, mester percura pa entre otro mas seguridad na entrada, y pone medida estricto pa evita nan entrada. “ATA no ta apoya e tipo di turismo (barata) aki. Foto cortesia Awe24.com, momento cu polis a yega y a atende cu e turistanan na e sitio.