Caribbean Multidiscplinary Hemato-Oncology Symposium na Aruba

ORANJESTAD - Riba dianan 15, 16 y 17 di october ta tuma luga na Aruba Holiday Inn SunSpree Resort e prome simposio multidisciplinario di hemato-oncologia, esta e Caribbean Multidisciplinary Hemato-Oncology Symposium. E simposio aki ta wordo organisa pa e departamento di oncologia di Dr. Horacio E. Oduber Hospitaal y ta inclui 30 orador internacional for di Hulanda, Merca, Surnam y Corsou, como tambe oradornan local y lo ta na Ingles.

NASCHOLING

Profesionalnan medico cu ta registra na Hulanda cu participa na e simposio lo ricibi puntonan di acreditacion pa nan “bij-en nascholing”. A dividi e simposio den dos parti. E dos prome dianan ta consisti di sesionnan riba un nivel academico cientifico medico y tin como grupo meta personanan den profesionnan medico; enfermera, docternan di cas y specialistanan, entre otro.

E di tres dia ta dirigi na e stakeholders den e area di cuido di salud di Aruba y lo trata topiconan manera screening pa cancer di pecho y cervix (boca di matris) y maneho paliativo. Maneho paliativo ta tuma luga na momento cu no tin cura mas pa e pashent y ta mantene e persona comfortable y sin dolor. Ademas lo trata tambe diferente otro topico manera prevencion y radioterapia.

DARYANANI

Dr. Daryanani a splica cu pa hopi aña caba tabata papiando tocante di un simposio multidisciplinario cu lo yuda pone Aruba riba mapa di oncologia den exterior tambe, principalmente na Hulanda. E ciruhano oncologo a agrega cu tin algun servicio manera radioterapia y medicina nuclear, cu no ta wordo ofreci na Aruba, pero e cuido cu si ta tuma luga na Aruba, esta cirugia y kimoterapia, ta di un nivel top.

Cuido di pashent di cancer no ta un asunto di un specialismo so, pero ta envolvi un team cu experticio den diferente area medico, dr. Daryanani a remarca. Semper mester pone tur e areanan aki hunto y e specialistanan mester traha den ekipo na bienestar di e pashent.

JONKHOFF

Dr. Roel Jonkhoff, kende ta Internista, Hematologo y Oncologo ta splica cu e tin cuater aña trahando na Aruba y cu den e periodo aki, e calidad di cuido den oncologia a subi hopi lihe.

“Nos ta duna cuido riba un nivel hopi halto aki,” el a bisa, añadiendo cu hopi por wordo haci na Aruba mes, pero den e caso cu e no ta posibel, e cuido ta wordo regla pa medio di e departamento di oncologia y partnernan pa e pashent bay den exterior. Dr. Jonkhoff a comenta cu e simposio aki ta sirbi tambe como vehiculo pa sigui mehora riba e servicio y cuido cu ta wordo ofreci na Aruba.

TURISMO

Finalisando dr. Jonkhoff a agrega cu e programa ta uno hopi druk cu ta caba tur dia pa 3:30pm pa duna espacio pa e bishitantenan por disfruta tambe di loke Aruba tin di ofrece den e area di turismo.