Precupacion pa buelo directo pa Aruba for di Eindhoven Hulanda

EINDHOVEN – Gobernantenan na e ciudad di Eindhoven ta precupa cu plan di Arke Fly pa cuminsa buelo directo pa Aruba. E intencion ta pa na november proximo ofrece buelonan pa Aruba y Corsou, pero e gobernantenan ta considera esaki hopi riscante, sigur pa motibo di posibel traficacion di droga. Alcalde di Eindhoven Rob van Gijnzel den un carta a participa esaki na e minister hulandes di husticia Ard van der Steur den un carta recientemente.

CONTROL EXTRA

Gobernantenan ta mustra cu ta premira cu tur pasahero mester pasa un control rigoroso personal y tambe di maleta. E ta pone un peso extra riba polis, y ta algo cu no mester ta asina. “E no mester tin un impacto riba e actividadnan regular”, e alcalde a bisa. Ademas, segun e alcalde, e buelonan no ta di importancia economico pa e region. Na mei ultimo, e programa noticioso Nieuwsuur a bisa cu gobernantenan di tres diferente ministerio ta presionando gobierno pa para Arke Fly di ofrece e buelonan aki.

INTERVENCION MINISTER DOWERS

Durante e bishita na Hulanda Minister di Husticia mr. Arthur Dowers, e tabata programa pa probecha pa trata e tema di preocupacion cu ta existi cerca instancianan riba e vuelonan di “riesgo” for di Eindhoven pa Aruba. E preocupacion pa e vuelonan aki di ArkeFly pa Aruba y Corsou ta cerca e cuerpo di ambtenaar, kende ta considera nan di riesgo. E ta algo cu e mandatario ta haya straño. E ta bisa cu e tabatin e impresion cu e tipo di vuelonan di riesgo a baha, pero Hulanda awor ta dunando indicacion diferente. E ta sinti mas bien algo di stigmatisacion di ambtenaarnan di Eindhoven pa cual el a pidi pa intercambia informacion cu por tin, basa riba e pensamento aki. Esaki pa mira si e ta hustifica e ponencianan cu a wordo treci dilanti awor. E ta kere cu esaki no ta bon pa imagen di Aruba, cu algo asina ta bini den prensa Hulandes.

GASTO EXTRA

Bek pa e comentarionan di Hulanda, nan ta sinti cu gastonan asocia na control di e pasaheronan (pa droga), lo costa den decenas di miyones di euro. Adicionalmente, e ekiponan necesario pa por haci e controlnan estilo 100%, lo no ta cla pa ora e prome buelo sali e direccion aki. Actualmente pasaheronan biahando di entre e paisnan den Reino Hulandes, ta wordo somete na control grandi di curpa na Schiphol pa evita traficacion di cocaina. Arke Fly tin programa pa bula dos biaha pa siman pa Aruba y Corsou for di Eindhoven, cuminsando na november proximo.