Croes: Gobierno lo yuda Mary Joan Foundation cu fondo

ORANJESTAD – “Nos lo apoya Mary Joan Foundation”. Asina minister di asuntonan social Paul Croes a bisa despues di a reuni cu e fundacion e mesun diamars mainta. Segun e mandatario, e fundacion ta un organisacion cu ta existi hopi aña y ta di un importancia grandi pa nos comunidad. Pesei lo mi busca e formanan con pa sigui apoya e fundacion aki den un forma structural” e mandatario a sigui bisa. Mientras cu no a bisa con exactamente, tabata cla cu esaki tabata den un forma financiero y structural.

SITUACION FINANCIERO

Durante e reunion a combersa riba e situacion financiero di e fundacion aki, cu durante e ultimo añanan a haya sponsorship di sector priva. E ultimo aki no ta pasando den e mihor momentonan y pesei Minister Croes kier a pone atencion riba e fundacion. “Nos a yega na un acuerdo di lo busca e formanan necesario pa asina apoya e fundacion aki financieramente y structural. Banda di esaki mi lo hasi un esfuerso adicional pa asina logra fondonan priva pa apoya dicho fundacion”, Minister Paul Croes a expresa na fin di e reunion. Minister Croes a hasi un apelacion tambe na comunidad pa apoya Mary Joan Foundation pa e trabao importante y necesario cu nan ta haci pa esnan cu ta pasa den e circumstancianan di bida aki.

TRABOU DI E FUNDACION

Segun e mandatario, e fundacion ta apoya personanan cu a wordo diagnostica cu cancer na pecho, nan ta duna apoyo social y ta siña personanan ahusta nan mes na e circumstancia nobo cu nan ta confronta cu ne na e momentonan ey. Un trabou sumamente importante”, Minister Paul Croes a expresa.

CONTENTO CU AYUDO

E trabao di MJF ta un trabao cu nos comunidad completo ta aprecia y seguramente gobierno tambe ta aprecia e esfuerzonan di MJF. Segun e comunicado di minister Croes, e directiva di e fundacion lo a keda hopi contento di por a reuni cu Minister Croes den un corto tempo asina, y lo a bisa di ta mira e reunion como un paso positivo pa resolve e situacion financiero di e fundacion.

BATI ALARMA

Tabata e siman aki cu e fundacion a bati alarma, indicando cu su existencia ta na peliger. Nan a informa comunidad di Aruba cu nan ta pasando den situation financiero critico y mester di ayudo urgente. MJF ta existi danki na donacionnan of actividad di fundraising cu nos ta organiza. Fundacion no ta ricibi subsidio fey di ningun instancia ni gobierno.

HAYA Y CORTA SUBSIDIO

Na aña 2012 a entrega un peticion pa subsidio financiero na Minister di Economia/Asuntonan Social y Cultura, Sra. Hooyboer-Winklaar, cual a wordo aproba den parlamento. Lastimamente na aña 2014 a ricibi un carta di Minister di Asuntonan Social, Sr. P. Croes, caminda fundacion a wordo notifica cu door di cortamento den caha di Gobierno, MJF lo no ricibi e suma aproba.

CANCER NA PECHO

Mary Joan Foundation (MJF) ta un fundacion conoci den comunidad cu ta sostene esnan cu ta pasando den e enfermedad di cancer na pecho. Cu e medionan financiero existente, segun calculacion, MJF tin 5 luna mas di existencia. Comunidad sa cu MJF no ta para keto y nos ta preparando un actividad den luna di Augustus pa recauda fondo como tambe pa sigi cu e trabou cu fundacion ta duna diariamente.

CIFRAS ALARMANTE

Cifra di cancer na pecho na Aruba no ta bahando. E trabou cu MJF ta extende na esnan diagnostica cu cancer na pecho ta hopi valioso pa nan y nan famia. E sosten ta wordo duna den forma di 2 profesional esta un trahado Social y un Psicologo. Banda di esey fundacion ta ofrece actividadnan Yoga, Fitness, Sosten den grupo como tame actividadnan social cual ta yudanan pasa e momentonan dificil y yudanan cu nan auto estima. Fundacion  a gradici e comunidad di Aruba di antemano pa un biaha mas uni nan mes pa cu e causa y yuda nan surpasa e momentonan dificil aki.