Segun polis Italiano, homber cu a causa morto di Julina de Lannoy, tabata bou influencia

AMSTERDAM - Polis italiano ta investigando e causa di e tragedia di boto di diasabra cu a causa morto di e Arubiano Julina de Lannoy na Italia .Investigacionnan inicial ta indica cu un homber di 44 aña di edat di Como, na timon di un otro boto, a dal e boto di Julina frontal. Polis ta investigando si e por wordo acusa di homicidio involuntario. 

HOSPITAL 

E hospital tambe ta  investigando si e homber Italiano tabata bao di influencia di narcotico. “E ta keda bao di supervision medico y ta wordo vigila pa personal di polis financiero”, CiaoComo ta informa. Segun e amigonan di De Lannooy, “nan velocidad riba e lago tabata hopi slow”, e plataforma di noticia local ta informa.

REACCION DI AMIGONAN

Na Amsterdam, reaccionnan riba morto di e instruktor di baile Julina de Lannoy (33) cu a fayece den e accidente di boto riba Lago Como ta bisa: ‘Nos kurason ta kibra’.  Como un instructor di twerking, e tabata un cara stima y conoci tanto na Amsterdam como na Bruselas. “Julina tabata un regalo pa tur hende cu tabatin e privilegio di conos’e.”

KICO A PASA

Julina de Lannoy tabata na boto cu seis amiga diasabra riba Lago di Como, banda di Viale Geno, un punto di bista panoramico popular den e ciudad di Como. Durante un choke, e la wordo tira den awa y a sufri lesionnan cu por a pone su bida na peliger door di e propeller di un di e dos botonan envolvi. Un operacion di rescate cu ambulance aereo no tabata exitoso.

TRAHANDO PA KOMPANIANAN GRANDI

De Lannoy tabata originalmente di Aruba y tabata biba na Bruselas pa e ultimo añanan, unda e tabata ocupa un funcion halto na Hema. Den su prome añanan, ela studia na Erasmus University Rotterdam, despues di cua ela traha pa companianan grandi manera Heineken i Nestlé. Tambe e tabata participa activamente den trabou boluntario, entre otro na Rocas, un organisacion pa studiantenan Arubiano na Rotterdam.

NA ARUBA 

Na Aruba, De Lannoy a traha pa un organisacion cu ta yuda mucha muhernan hoben desaroya personalmente y socialmente, e Orden Internacional di Arco Iris pa Mucha Muher. E organisashon a anuncia su fayecimento riba Facebook. “Nos curason ta kibra”, e comunicado ta bisa. “Julina tabata representa tur loke amor, sosten y coneccion ta representa. E tabata radia asina tanto alegria cu e tabata contagioso, y su presencia tabata un regalo pa tur hende cu tabata conos’e.” E organisacion a declara cu e “ta simpatisa profundamente cu su famia, specialmente su mama Lisa y su ruman muhe Kiana, durante e tempo dificil aki.”