Riba nombracion di Herde como minister, PPA tin ‘mixed feelings’ y MEP ta contra

ORANJESTAD – Despues cu ‘porfin’ partido AVP a keda cla cu candidato pa reemplasa Mike de Meza, cu sosten di hasta coleganan di partido cu anteriormente tabatin obhecion, y partido di coalicion FUTURO, e dos partidonan di oposicion a reacciona tambe. Partido MEP ta completamente contra, mientras cu partido PPA tin ‘sentimento mixto’ riba e nombracion aki. Loke a hala atencion tambe, ta cu mientras cu tabatin menasa di varios miembro di partido cu nan lo a ‘bula afo’, tur a ‘draai bek’, y awor a didici di acepta e candidato Herde, cu mientrastanto a bira minister. Pa loke ta e reaccionan di opositornan, MEP y PPA pues cada un a duna nan punto di bista

PPA  

Mientras cu partido PPA pa medio di su lider Otmar Oduber a desea Sr Herde hopi exito y ta convenci cu su persona, cu e experiencia acumula, lo haci su mihor esfuerzonan den e puesto di Minister, nan tin nan duda riba e nombracion “ Ta straña nos cu mientras a purba ilustra un imagen di kier rehubenese e partido y gobernacion, despues di a postula Sr Cecilia como lijst trekker, awor ta nombra un di cuatro Minister di parti di AVP den e gabinete, SIN duna oportunidad berdadero na e generacion nobo” Otmar Oduber a bisa Noticiacla riba e situacion. “Ta parce como si fuera no tin confianza den esnan cu si a postula nan mes riba lista y ta prefera di nombra un vak minister cu no ta un experto den e cartera”.

MEP

Pa partido MEP, su lider y parlamentario Evelyn Wever-Croes a expresa e.o. cu Mike Eman como lider di AVP poniendo sr. Herde como minister cu no ta riba lista di AVP, ta dunando un bofta den cara di tur e candidatonan riba su lista y specialmente e hobennan. “Den Parlamento tin hende cu hopi experiencia, cu tabata director di departamento, cu tabata tin posicionnan clave den enseñansa y den companianan estatal cu por a tuma e funcion aki.  Pero na fin di dia mayoria di parlamentarionan di AVP y Futuro mes a aproba e nombracion aki y e ‘brevet van onvermogen’ di nan lider”.  Tambe Parlamentario Wever-Croes a expresa su preocupacion cu gobierno, djies pa yena un cartera, ta trece un pensionado aden pa ocupa dicho poscion. E cartera di Infrastructura y Energia tin hopi reto y investigacionnan penal andando y lo mester hopi atencion. “Mas pio ainda ta e echo cu nan ta declara cu señor Mike de Meza cu ta un parlamentario lo yuda señor Herde y dun’e conseho. Esaki ta un violacion di nos constitucion y di nos trias politica. Ta bisto cu e meta tras di pone un pensionado den e funcion aki ta pa señor den Meza por sigui “Wheel and deal” manera cu e ta desea”.