ABV: Contra un di tres director pa hospital Horacio Oduber

ORANJESTAD – E proceso pa nombra un director nobo pa hospital ta den su fase final, y ta premira cu dentro di poco lo nombra e candidato selecta, manera cu NoticiaCla.com a raporta recientemente. E seleccion a keda te na 2 persona (ambos stranhero) y ta cuestion di luna prome cu e proceso keda cla. Sindicato di e trahadonan, ABV, a reacciona riba e declaracion di e mandatario responsabel pa hospital, Alex Schwengle, particularmente riba su declaracion cu ‘no tin arubiano capacita pa e funcion aki.

DI TRES DIRECTOR

Segun e presidente di e sindicato, Gina Maduro, ABV ta puntra su mes si ta vocero di RvT Minister Schwengle a bira. “ABV for di un comienso ta contra un di tres Director. Ora cu e Hunta di supervision anterior a purba bin cu Sr. Halley ABV a para fuerte y tabata contra pa entrada di un di tres director” Maduro ta bisa. Segun e presidente, nos unico Hospital no mester di un di tres Director. E analisis ta cu un hospital asina chiquito cu un capacidad di 300 cama y den e renobacion y expansion di Horacion Oduber Hospital (HOH) no lo bin cama extra. “ Mas bien lo elimina cambernan cu 6 cama pa camber di 4 cama y camber di 2 cama pa crea mas privacidad pa e patient a base di e populacion di pais Aruba” Maduro a sigui bisa.

DIALOGO 

E tempo ey a start un dialogo entre diferente stakeholder nan y Minister Schwengle na unda cu ABV a bin cu un ‘expert Rapport tocante organisatie structuur y na unda cu e conclusion di e rapport aki ta mustra cu nos no mester di un di tres director. “ E unico manera cu ABV ta mira un di tres director ta den futuro un fusie entre Instituto Medico San Nicolas (IMSAN) I HOH na unda bo tin 3 director caba” Maduro a sigui bisa.  

GASTO INNECESARIO

ABV ta keda wak entrada di un di tres director como un gasto innecesario y cu e salario aki por uza esaki mas eficiente y pone mas enfermero na cama di e patient. “ Actualmente e cuido basico porfin a cuminsa haña su atencion debidamente”. Pa hopi aña caba ABV ta boga pa un ‘werklastmeting’ y te awor esaki ta tumando lugar bao maneho di Sr. Ezzard Cilie cu ta director medico interino cu ta hacienda e trabou aki pa 10 luna caba. Otro proyecto cu ta den preparacion pa cuminsa ta e EPD systeem : Electronisch Patient Dossier na unda cu tin tur informacion necesario di e patient cu ta keda den un sistema digital registra.

MAS PROYECTO

E JCI standard tambe HOH ta bezig cune. ABV ta mirando cu porfin e cuido basico ta hayando su debido atencion cual pa añanan a wordu neglisha door di e diferente directornan medico den pasado. Dr J. Falconi a cuminsa cu cambionan positivo manera e introduccion di VARR y JCI standard y awor Sr. Ezzard Cilie ta implementando nan. “Nos tin hendenan capacita arubiano cu por funciona” Maduro ta sigura bisando.

CAO TRANCA

Pa loke ta trata e CAO e ta tranca. For di comienso di Maart 2015 ABV ta na mesa cu gerencia di HOH pa negoshacion di CAO. E CAO a vence desde 1 di Juli 2015. Partidonan no por haña otro na mesa. Ambos partido a dicidi di pone mediador di gobierno Sr. Anselmo Pontilius na altura y na unda dia 18 di Augustus 2015 lo continua cu e negoshacion di CAO hunto cu mediador di gobierno.” No tin placa pa CAO pero si tin placa pa bin cu un di tres director. ABV lo keda para firme contra un di tres Director”, Maduro a finalisa bisando.