Van Marum ta nenga cu Hulanda a viola derecho humano contra migrantenan venezolano na Aruba

DEN HAAG – Secretario di Estado Hulandes pa Relacionnan di Reino, Eddie van Marum, a nenga rotundamente cu Hulanda a hunga cualkier rol den violacion di derechonan di migrantenan y refugiadonan Venezolano na Aruba. Su kontesta ta bini despues di e lansamento di un raport di Amnesty International titula “Unprotected: Failures in the Protection of Venezolan Refugees in Aruba”, publiká dia 1 di òktober 2024.

“Mi no ta di acuerdo cu e afirmacion cu e sosten Hulandes tabata dirigi pa rastrea e Venezolanonan, detene nan, of deporta nan, ni cu Hulanda a contribui na violacionnan di e principio di no-refoulement na Aruba,” Van Marum a skirbi den un carta pa Tweede Kamer Hulandes.

E principio di no-refoulement ta prohibí pa regresa individuonan na un pais caminda nan ta kore riesgo di wordo persigui. E raport di Amnesty a critica e gobierno hulandes pa supuestamente contribui, indirectamente, na practicanan asina na Aruba.

Van Marum a aclaria cu rastreo, detencion, of deportacion di Venezolanonan nunca a forma parti di e sosten brinda door di Hulanda na Aruba. Sinembargo, e la reconoce cu Hulanda si a contribui financieramente, riba peticion di Aruba, na un fondo di repatriashon destina pa personanan cu no tin derecho di residencia legal mas.

Den loke observadornan ta mira como un asercamento familiar den asuntonan delicado di Reino, Van Marum a enfatisa repetidamente cu migracion ta un asunto domestico, y cu Aruba ta carga e unico responsabilidad pa atene su mes na obligacionnan di derechonan humano y convenionan internacional di refugiado.

E posicion aki a hala crítica di organisacionnan di derechonan humano, cu ta argumenta cu Reino Hulandes no por separa su mes completamente for di e practicanan di derechonan humano den su paisnan constituyente.

E debate ta enfatisa e complexidadnan di gobernacion denter di Reino, particularmente ora ta trata di responsabilidadnan comparti y proteccion di poblacionnan vulnerabel manera migrantenan venezolano cu ta huy di crisis politico y economico. NOTA: Texto cortesia Curacao Chronicle. Pa e carta mes, por click AKI.