LATAM awor si ta cla pa introduci ruta entre Bogota y Aruba

ORANJESTAD – Aeropuerto di Aruba a anuncia algo cu Noticiacla a presenta algun tempo atras caba, esta cu LATAM Airlines ta cla pa introduci un ruta directo nobo entre Aeropuerto Internacional El Dorado (BOG) na Bogota y Aeropuerto Internacional Reina Beatrix (AUA) na Aruba. Noticiacla tabata prome cu a informa for di momento cu Bogota a solicita e rutanan aki oficialmente, pero cu no tabata un hecho ainda. Aworaki, esaki a concretisa. E lansamento di e servicio aki ta responde na e aumento di demanda pa Aruba y ta premira cu lo engrandece e conectividad entre Colombia y Caribe, mientras ta sostene tanto turismo como e fortificacion di e relacionnan economico.

E servicio plania ta incluí tres buelo semanal—riba dialuna, diabierne y diadumingo—opera cu avionnan Airbus A320 cu ta conta cu 174 asiento den tanto e clasenan Premium Economy como Economy. Ademas di servicio di pasahero, LATAM lo ofrece capacidad di carga y post riba e ruta aki, ampliando oportunidadnan comercial entre ambos mercado.

Buelonan ta programa pa cuminsa dia 1 di december 2025, pa un periodo inicial di dos luna. Si e rendimento ta cuadra cu expectativanan, e ruta lo bira un adiccion permanente na e red di LATAM. E vuelo lo sali for di Bogota pa 10:10 AM, yegando Aruba pa 1:20 PM. E vuelo di regreso lo sali for di Aruba pa 2:35 PM, aterisando na Bogotá pa 3:55 PM.