Bermudez: Asunto di parlamento no ta asina grave manera ta parse

ORANJESTAD – “Di parti di gobierno, ta sigui cu preparacion di e concepto”. Asina minister di finanza Angel Bermudez a bisa NoticiaCla.com awe mainta. E mandatario a reacciona riba e articulo unda cu parlamento a dicidi cu no ta reuni mas riba e ley di LAFT prome cu 1 di augustus. “Mi no por duna comentario riba (e) proceduranan di Staten”, Bermudez a sigui bisa. Sinembargo, su tras e mandatario ta usa un dicho conoci, pa describi e situacion basa riba declaracion di parlamento. “ Durante reces/vakantie periode e sopi no ta wordo bebi asina cayente”, indicando cu cos ‘no ta asina grave, manera cu e ta mustra’.

DWJZ

Mes momento di parti di departamento huridico di gobierno (DWJZ), NoticiaCla.com a haya reaccion cu ‘ta trahando duro pa cumpli cu e deadline’. Y esaki ta cuadra cu informacion cu NoticiaCla.com a tende ayera, esta cu for di momento cu gobierno a ricibi e conseho di Raad van Advies (RvA) riba e ley di e colegio di supervision financiero arubano CAFT, esta LAFT. Aki ta papia cu nan lo ta trahando ‘24/7’ pa por keda cla cune na tempo toch.

DESICION DI PARLAMENTO

Tabata dialuna cu NoticiaCla.com a bin cu e noticia cu Parlamento di Aruba no ta bay trata e concepto di ley Aruba Financieel Toezicht (AFT) prome cu 1 di augustus mas. NoticiaCla.com tin confirmacion cu e decision a cay den parlamento cu, -mirando cu ‘e no ta haalbaar’ mas-, nan lo no forza esaki mas. Nan ta conciente tambe cu esaki lo por tin consecuencia, pero ‘hopi mas no por haci’. Sigur no, si tene na cuenta cu ta apenas dialuna e conseho di Raad van Advies (RvA) a bay gobierno bek, y cu basicamente e conseho ta cu mester ‘skibi gran parti di e ley di nobo’. Cu e informacion aki, e ta pone gobierno tambe den un posicion hopi ‘peligroso’ ya cu e por nifica cu gobierno no ta cumpli cu e protocol di 2 di mei. Y esey consecuentemente lo por nifica cu gobierno di Reino lo tuma paso contra Aruba. E unico forma cu lo por pasa esaki toch, ta si gobierno keda cla cu e cambionan y of manda e ley parlamento sin e cambionan. Algo cu tanto parlamento como e fraccionnan ta duda.

DECISION TA TUMA

Informacionnan cu e website aki tin confirma ta cu, -tanto den seno di e varios fraccionnan como parlamento mes-, a dicidi cu ‘no ta bay trata esaki mas prome cu 1 di augustus’. Y segun e fuentenan cu a confirma esaki awe na e website aki, nan ta motiva esaki tambe consecuentemente. Un fraccion te hasta a manda un carta siman pasa pa pidi pa pasa e ley aki, despues di recess, ya cu e no ta wordo considera como un ley di emergencia. Varios miembro di fraccion berde a confirma tambe cu no ta responsabel pa ‘bulldoze’ e ley, y ta considere mas bien un ‘falta di respet’ pa parlamento cu ta trata nan asina. Gobierno no a haya un bon punto serca parlamento pa cu e forma con esaki a bay. Propio presidente di parlamento den fin di siman Marisol Lopez Tromp a te hasta bisa pa no warda parlamento ‘wanta nan rosea’ pa e ley yega, sino nan ta stik.

MOTIVACION DI DESICION

A analisa cu e hecho cu ta awe (dialuna) numa, e ley a ‘sali’ for di RvA, lo tuma (por lo menos) un siman (segun informacion ricibi) pa cambia e ley y prepara e ‘nader rapport’ (cambionan segun conseho di RvA). No obstante esaki, for di otro fuentenan e website aki a compronde cu gobierno (for di awe) ta trahando practicamente 24/7 pa keda cla cu e ‘nader rapport’ aki. Nan ta purbando tur cu tin pa logra ‘cumpli cu e deadline’. Pero for di parlamento, a splica cu si pone mes cu e rapport keda cla pa e siman aki, nos ta yega 24 pa 25 di juli, cu ta otro fin di siman. Despues a splica cu mester duna parlamento un siman di tempo pa por yama un CC (reunion di comision central) pa prepara pregunta pa gobierno (analisando cu e no ta un ley facil). Esaki ta pone cu ta pone e fecha ya na 3 di augustus, sin cu a trata e ley mes. Ta sigui e proceso pa gobierno contesta e preguntanan, cu ta pone cu pa posiblemente 13 di augustus esaki ta keda cla. E ora ta dura 4 dia pa yama un asina yama Openbare Vergadering (OV) pa trata e ley.

RECESS

Y tur esaki, mientras cu parlamento ta den pleno recess, cu ta nifica cu ningun hende no ta trahando. Mientras cu no tin ningun ley cu drenta, no por yama ningun reunion y planea nada. Y consecuentemente no por yama ningun persona, sea parlamentario ni personal (cu tambe ta cu vacacion) pa bin traha. Y otro siman, dos miembro di AVP ta sali pa reunion parlatino na Panama tambe. Esey no ta yuda tampoco. Analisando tur esaki, parlamento a dicidi cu no ta bay yama e reunion prome cu 1 augustus, ya cu simplemente e ‘no ta haalbaar’.

PROTOCOL 2 MEI

Loke esaki ta nifica, ta cu door cu no ta trata e ley prome cu 1 augustus, (manera a wordo bisa na e website aki), gobierno (no parlamento) ta keda sin cumpli cu e promesa na Hulanda cu nan ta keda cla pa 1 di augustus segun protocol di 2 di mei. Falta di cumplimento, ta nifica cu Conseho di minister di Reino, por aplica e instrumentonan na su poder, cu por nifica un ‘maatregel’ pa pais Aruba. E website, siman pasa ainda, a haya informacion ‘inoficial’ cu Hulanda no ta dispuesto pa duna Aruba un extencion di 1 augustus. Ora cu e website aki a puntra pa confirmacion di esaki, a bin tende ‘oficialmente’ cu Aruba a ‘priminti cu nan lo cumpli y Hulanda ta wanta Aruba na su promesa’.