Gabinete AVP-Futuro: 100 Dia di liderazgo hunto, compromiso y progreso

ORANJESTAD – Dialuna gabinete AVP-FUTURO a presenta nan lista di logro pa loke ta e prome 100 dianan den gobierno. Esaki a tuma lugar den Fort Zoutman. Prome minister Mike Eman, a splica e.o cu Gabinete AVP-Futuro a forma a base di un coalicion fuerte y visionario: Premier mr. Mike Eman, Vicepremier mr. Gerlien Croes, Minister di Salubridad drs. Mervin Wyatt-Ras, Minister di Turismo mr. Wendrick Cicilia, Minister di Economia y Finansa mr. Geoffrey Wever, y Minister di Husticia mr. drs. Arthur Dowers tabata presente, hunto cu e 12 parlamentarionan di coalisicion. 

ACUERDO DI GOBERNACION 

Segun Eman, e acuerdo di gobernacion di Gabinete AVP-Futuro ta forma un base solido riba cual, cu respet mutuo y cooperacion amplio, ta traha riba un futuro unda interes general ta central. For di e prome dia a opta pa un dialogo habri cu actornan clave den comunidad: sindicatonan, gremio comercial, sector turistico, institucionnan social y e comunidad di Aruba. “Despues di 100 dia, e Gabinete ta wak bek cu orguyo riba e resultado logra, y cu determinacion ta mira padilanti na e siguiente fase di reconstruccion y renobacion” e gabinete a sigura dialuna. “Bao di liderazgo di Premier Mike Eman y Vicepremier Gerlien Croes, un duo dinamico di experiencia y accion, e Gabinete ta traha pa un Aruba na unda progreso ta comparti pa tur cuidadano”. Despues, cada minister a repasa loke nan ta sinti cu nan a logra durante e prome 100 dia di gobernacion.