Albatros Airlines ta añadi servicio adicional pa Aruba

ORANJESTAD – Durante un bonbini caluroso door di e representantenan di Aruba Airport Authority N.V. (AAA) y Aruba Tourism Authority (ATA) e pasaheronan cu a yega for di Margarita abordo di e buelo inaugural door di Albatros Airlines a wordo oficialmente ricibi den AAA su VIP-Room. Albatros Airlines a inicia nan operacion pa Aruba na December 2014.

OPERACION

Albatros Airlines ta opera 3 buelo diario for di Aruba pa Las Piedras cu ta sali 09:30, 14:30 y 16:30. Nan flota cu ta wordo uza pa nan servicio pa Aruba ta consisti di un Cessna 208 (12 pasahero) y un Embraer cu capacidad pa transporta 30 pasahero. E mesun avion lo wordo uza pa su servicio diario pa Margarita, Venezuela.

COMMERCIAL DIRECTOR

Sr. Orlando Padilla, Albatros Airline su Commercial Director tabata contento pa anuncia cu e aerolinea tin plan grandi pa futuro cercano. E plannan aki ta inclui un destinacion nobo cu lo cuminsa pronto: Barquisimeto. AAA su Head Airline Marketing Sra. Jo-Anne Arends tabata contento pa yama e representantenan di e aerolinea hunto cu e Tour Operators di Venezuela cu tabata invitado abordo di e buelo inaugural pa Aruba bonbini y tambe a duna un muestra di aprecio pa e ruta nobo cu a wordo lansa. Aeropuerto di Aruba kier encurasha pasaheronan pa bishita Albatros Airlines su oficina nobo situa na aeropuerto y lo warda riba mas buelo for di mas destinacion pronto.