Tin plan pa expande Aruba Caribbean Hilton Resort

ORANJESTAD - Lo tin cambionan grandi den e “rebranding” di e edificio cu te cu dia 15 di juli ainda tabata conoci como Radisson hotel, pa e bira un hotel estilo Hilton. Lo tin renobacion di e cambernan, e lobby y e restaurantnan y mayoria di e trabao aki lo tuma luga na aña 2016. Den algun tempo tambe lo cuminsa cu expansion di e hotel pa asina hisa e rendimento pa e casino, e restaurantnan y e tiendanan.

FUTURO EXPANSION

Como e prome high-rise hotel di Aruba, Caribbean Hotel tin hopi tereno y apenas 355 camber. E hotel ta reparti den diferente edificio y esaki ta haci cu e mester hopi mas empleado pa por brinda e miho servicio pa tur edificio. Esaki ta hiba un costo mas halto y p’esei e expansion den futuro ta necesario pa e casino, restaurantnan y retail funciona miho, Rene Kan a splica.

REBRANDING

E representante di Aruba Growth Fund, Rene Kan a bisa cu Radisson no ta un cadena cu ta conoci pa e tipo di hotel cu e tabatin na Aruba, consecuentemente e tipo di cliente cu ta fiel na Radisson no ta echt e tipo di cliente di un Aruba Caribbean. Cu e “rebranding” pa Hilton esaki ta bay cambia y lo mantene sigur tambe e huespednan fiel cu aña tras aña ni cua “flag” e hotel tabatin, ta sigui bolbe pa keda na Aruba Caribbean, un nomber cu ta “bende su mes” y pa cual e conexion cu e nomber Hilton sigur lo yuda hopi.

SINDICATO

Finalisando Rene Kan a bisa cu Aruba Growth Fund a sinta cu sindicato FTA y e empleadonan y, aunke no a duna publicidad pa via di negociacionnan, nan tabatin contacto caba cu e sindicato for di prome cu e benta a tuma luga. El a expresa, “Arubiano nos ta” y como Arubiano AGF sa kico ta pasando na Aruba y tabata papia cu FTA pa nan papia cu nan empleadonan pa duna “updates” di e situacion unda cu tabata necesario, specialmente ora cu tabatin rumornan no corecto circulando.

ARUBA GROWTH FUND

Na aña 2011, e Arubianonan Rene Kan y Milton Berlinski, hunto cu Justus Martens, un partner di negoshi di Rene Kan pa mas di 26 aña caba, a forma Aruba Growth Fund cu e obhetivo pa inverti fondonan Arubano, o sea e “florin Arubano”, den compania y proyectonan na Aruba. Aruba Growth Fund ta forma pa fondonan di pensioen di APFA, Pension Fund Tourism Sector Aruba, di e fondonan di pensioen di empleadonan di NV Elmar, WEB Aruba N.V., Aruba Ports Authority N.V. y Caribbean Mercantile Bank N.V. Na tur nan ta alcansa mas di 10 mil contribuyente, cu mensualmente ta spaar pa nan pensioen, di cual e fondonan di pensioen ta inverti pa rende nan cen mas cu por. Aruba Growth Fund ta honra di por aporta na esaki, cu conocemento di su tres directornan riba tereno financiero, bancario y di maneho. Aruba Growth Fund ta un grupo Arubiano cu experiencia internacional pa mas di 25 aña, cu tin como socio un partner financiero internacional hopi grandi y solido. Aruba mester ta orguyoso cu awe nan por cumpra un propiedad asina bunita, Rene Kan a conclui bisando.NOTA. E foto ta uno di e refleccion di e luz riba e edificio. E letrero oficial mes mester wordo ubica proximamente.