Oduber: Mester ‘re-distribui’ turista pa otro beachnan

ORANJESTAD – E proyecto di renoba beachnan na Aruba a cuminsa siman pasa. Trabounan awe ta continua riba e prome fase, cu ta na altura di Nikky Beach y lo continua pa e proximo lunanan. Segun minister di turismo Otmar Oduber a splica NoticiaCla.com, a cuminsa na Nikky Beach ya cu kier hala turistanan for di e beachnan congestiona y trece nan otro caminda. Entre nan tin e turistanan cu ta bin riba bapor crucero. Pesey a pensa riba Nikky Beach como caominta pa cuminsa.

E PROYECTO MES

E proyecto mes, ta ensera cu lo saca tur e lodo y sushedad cu tin den profundidad, pa yene bek cu santo limpi blanco den henter e area di Nikki Beach bay pa cas di Gobernador. Ta crea asina mas beach publico cu ta masha gusta pa nos localnan, specialmente den temporada di campamento, pero cu awor tambe lo ta na e nivel desea pa nos bishitantenan por disfruta di esaki.

INVERSION GRANDI

E mandatario a admiti cu e inversion ta grandi pero necesario. Despues di Nikky Beach, otro aña ta bira e area di Playa Linda, Holiday Inn y Marriott cu sigur mester di atencion. Nos kier corigi esaki y preserva esaki pa futuro.” “Cu tur e proyectonan aki tumando luga, ta sigur cu nos ta mehora e calidad di nos beachnan y sigui eleva e Producto Aruba” Oduber a finalisa bisando.