Famia Real a saca potret den sombra, debi na e ola di calor na Hulanda

DEN HAAG – Debi na e ola di calor cu ta azotando Hulanda, Famia Real a opta pa nan potret di Verano, pa busca lugarnan den sombra. Rey Willem-Alexander, Reina Máxima y nan tres yiu muhernan a posa pa prensa den hardin di Paleis Huis ten Bosch dialuna marduga trempan. Manera ya indica, e famia a skohe principalmente luganan cu sombra bou di e matanan. Nan cacho Mambo tambe tabata tey atrobe. E pareha real y e prinsesnan Amalia, Alexia y Ariane a cana for di e palacio residencial di e famia, despues di cual nan a pose pa e prome potretnan. E famia despues a cana bay un luga cu sombra, caminda nan a pose hunto riba un brug. E pareha real tambe a laga saca nan potret cu Mambo. E cacho despues a regresa lihe cerca e prinsesanan.