Gabinete AVP/FUTURO a aproba fondo pa renoba Arubahuis

ORANJESTAD  – Gabinete AVP/FUTURO a anuncia diabierna atardi cu nan a  aproba un decreto ministerial pa inicia cu e renobacion oficial di Arubahuis – e cede oficial di Gabinete di Minister Plenipotenciario di Aruba na Den Haag.

E anuncio a wordo haci pa Minister Gerlien Croes, durante su prome bishita oficial na Hulanda recientemente, pero awe diabierna a keda oficialmente participa. Den presencia di e personal actual di Gabinete di Aruba y su Directora Joselin Croes, Minister Croes a anuncia oficialmente e noticia. “Reforsando e compromiso di e gobierno pa restaura dignidad y funcionalidad na un edificio cu ta simbolico pa pais Aruba”.

BANDONA

Segun e gabinete, Arubahuis, como un edificio historico y patrimonio nacional, “a keda bandona pa casi tres aña, despues cu su condicion a deteriora te na punto cu empleadonan no tabata sigur mas trahando den e edificio. E situacion a forsa e personal pa bandona e edificio y opera for di un oficina provisional cu no ta actualmente apto pa e nivel di representacion diplomatico cu Aruba merece”, e comunicado ta sigui bisa.

“Esaki no ta solamente un renobacion fisico, pero un restauracion di respet pa nos pais y e hende cu ta representa Aruba cu orguyo. Un oportunidad nobo pa duna contenido nobo y debido na traha riba nos relacion y cooperacionnan den reino”, Minister Gerlien Croes a sigui bisa.

Minister   Croes a confirma cu e renobacion mester keda cla den 2026, y cu e fondo destina ta un realidad, danki na colaboracion di varios departamentonan gubernamental na Aruba. Minister Geoffrey Wever y Prome Minister Mike Eman tambe a firma e decreto corespondiente.