Croes:No tin fecha ainda pa reapertura di Stadio Guillermo Prospero Trinidad

ORANJESTAD – No tin fecha ainda pa reapertura oficial di Stadion Guillermo Prospero Trinidad, despues cu a cera esaki dia 27 di mei ultimo. Asina por a compronde di minister di deporte Gerlien Croes diabierna. E mandatario a recorda diabierna e.o. cu durante un rueda di prensa na stadion mes, dia 27 di mei 2025, e la a informa cu e stadion lo wordo cera temporalmente pa continua cu e fase final di trabou. “ E decision aki ta basa riba e necesidad pa finalisa varios aspecto tecnico y structural di e edificio, e pista di atletismo, y otro trabounan relata ainda pa cu e uzo di e cancha pa futbol. Esaki despues cu tawata falta tur transparencia y cooperacion di parti di esnan cu tawata encarga cu e proyecto bou di auspicio di e gobierno saliente”.

UPDATE DI E SITUACION

E minister a duna un claridad encuanto e situacion actual, specialmente riba e pista di atletismo y a mustra cu e.o. falta di un fecha oficial pa reapertura.  

ACREDITA PISTA DI ATLETISMO

Pa e pista di atletismo por wordo oficialmente acredita, e mandatario a bisa cu tur elemento tecnico mester ta cla y cumpliendo cu normanan internacional. Esaki ta un paso esencial pa por duna uzo regular pa entrenamento y eventualmente pa competencia local y internacional.

CONSTRUCCION

E minister a bisa ademas cu ta preparando un plan di construccion cu por acapara tur e trabounan ainda cu a keda sin wordo hasi of cu no a keda finalisa den e proyecto aki. “Nos ta traha duro pa entrega un stadion funcional, sigur y di nivel como debe ser pa nos atletanan y pa comunidad. E trabou ta sigui, y mi ta compromete pa e proyecto wordo finalisa lo mas pronto cu ta posibel”, Minister Gerlien Croes a subraya. “Nos compromiso ta: un Stadion Guillermo Prospero Trinidad cla y funcional pero cu tur debido tranparencia tambe na comunidad” e minister a finalisa bisando.