Conseho di RvA ta pidi pa ‘skibi ley pa CAFT’ di nobo

ORANJESTAD – E conseho di Raad van Advies (RvA) cu gobierno di Aruba a ricibi awe mainta, ta sugeri pa gobierno skibi e ley ‘Aruba Financieel Toezicht’ (AFT) di nobo. Esey a pone cu awe mainta (taba)tin un core core den seno di gobierno. Fuentenan a confirma na NoticiaCla.com cu e conseho cu a keda entrega awe mainta ta devastador y cu e conseho ta indica cu mester ‘skibi practicamente henter e ley di nobo’. Esey ta pone gobierno den un spot fastioso, ya cu e ta pone cu no por keda cla pa pasa e ley prome cu 1 di augustus. Consecuentemente awe mainta tabatin (y ainda) tin un sin fin di yamada pa wak ‘con por soluciona e problema aki’.

SIMAN PASA

E ley mester a keda cla siman pasa, pero diabierna a sera sin cu e conseho di RvA a keda entrega. Awe mainta porfin esey a sosode, y manera cu esaki a sosode, e la crea e histeria necesario, mirando e resultado di e ley. Ta keda awor na gobierno di Aruba pa mira si e ta adapta e ley segun conseho di RvA, of ta pone un banda y mande asina mes pa parlamento trate pa e keda cla na tempo. Di otro banda, NoticiaCla.com a compronde cu e ley ‘lo por wordo’ adapta basta lihe y cu toch por keda cla na tempo.

TARDANSA REUNION

Tabata diasabra cu NoticiaCla.com a raporta e comentario di presidente di parlamento di Aruba Marisol Lopez Tromp riba e tardansa di e ley AFT.  "No tin parlamentario wantando nan rosea te ora Laft drenta". Asina presidente di parlamento Marisol Lopez a bisa NoticiaCla.com den fin di siman. Parlamento di Aruba ainda no a haya e concepto di ley LAFT cu mester oficialisa e colegio di supervision financiero pa Aruba CAFT. NoticiaCla.com a haya confirmacion cu diabierna e ley no a yega na Parlamento y cu e ta na Raad van Advies (RvA), ainda. Cu esaki na bista, parlamentarionan ta den un dilema pa cu nan vakantie. Pero informacion cu premier Eman ‘lo a pidi parlamento pa cancela reces pendiente e tratamento’ a keda desmenti diasabra mainta na NoticiaCla.com pa Lopez.

ORDEN DI ’ARIBA’

E informacion cu tabata circula for di diabierna, tabata indica cu parlamentarionan ta rabia riba e situacion y cu nan lo kier ‘luz berde’ di Eman, pa bay cu vacacion ya cu ta mira cu no ta alcansa toch mas pa pasa e ley LAFT prome cu 1 augustus. Esey ta e fecha riba cual e ley mester ta pasa, conforme e protocol firma 2 di mei entre Hulanda y Aruba. Eman lo a bisa parlamento cu no por bay cu vacacion y cu nan lo mester ‘si ta necesario’, pasa e ley den un dia.

COOPERACION ENVEZ DI ORDEN

Segun Lopez, e ta desmenti e informacion ey. “Na mi sigur cu no. Mi ta kere mas bien e lo pidi cooperacion ora cu e sinti necesidad of e interes pa nos pais” Lopez a bisa. “Opdracht e no por duna Staten”. E la recorda cu parlamento ta den pleno reces aworaki te dia 17 di augustus proximo. “Cu ami sa, no tin Statenleden wantando nan rosea aden te ora Laft drenta. Sino nan lo a stik caba” Lopez a sigui bisa.

OLV NO TEY AINDA

E ta sigui splica cu si e OLV (e ley) no a yega Staten, y si e OLV no ta cla pa entrega na Staten tampoco aparentemente, e ora e pregunta mester ta dirigi na gobierno pa check kico e status dje OLV ta. “Staten ta cuminsa cu su proceso pa boek in y reparti e OLV na tur Statenleden ora cu un ley drenta ‘oficialmente’ na Staten. Esey no ta e caso ainda almomento cu e OLV aki. Staten no a ricibi e OLV ainda!” Lopez a bolbe reitera.

CANA PROCESO

Ademas segun Lopez, e esencia ta cu si e OLV no ta cla pa bin Staten, of cu ainda e mester bay wordo adapta of coregi despues cu e sali for di Raad van Advies (RvA), cu “ logicamente e no tey drenta Staten pa e siman aki”.

RAAD VAN ADVIES

Manera indica caba, for di fuentenan fidedigno mientrastanto, e website aki a compronde cu te cu diabierna e ley ainda tabata na RvA y cu posiblemente te otro siman esaki lo a keda entrega na gobierno bek. E proceso e ora mester ta cu gobierno tin cu adapta esaki basa riba conseho di RvA, prome cu e por drenta parlamento (Staten). Despues ta sigui un reunion di comision central pa trata e ley, y e ora numa, por trata e reunion den un session publico, y aproba esaki.