Ta investigando tint di auto cu a causa accidente fatal di diadomingo

ORANJESTAD - Awe experto di trafico lo haci investigacion na e ‘lichtdoorlatendheid’ di e glasnan di e auto cu a dal e victima di trafico diadomingo ultimo cu consecuencia fatal. Esaki a keda confirma awe mainta door di ministerio publico, pa NoticiaCla.com. E ‘lichtdoorlatenheid’ ta e prueba pa wak con scur e glas ta y cuanto luz e ta laga pasa. Es decir, pa calcula e visibilidad. Dor di midi cuanto Luz e ta laga pasa. NoticiaCla.com a compronde cu fiscal encarga cu e caso, a keda hopi disgusta cu e hecho cu ta core cu glas asina scur den oranan di anochi.

CURPA DEN BESLAG

Pa loke ta e curpa, e ta ‘den beslag’ ainda y ta den curso di dia awe lo haci autopsia pa confirma e motibo di morto di e victima. Asina cu esaki keda completa, lo laga a curpa liber pa e famianan por dera nan ser keri.

ACCIDENTE FATAL

Tabata ayera mainta, manera NoticiaCla.com a raporta caba, cu un peaton a bira e di 7 morto di trafico. Tabata 3:30am cu central di polis a haya e melding di e accidente. Vocero suplente di polis Liliana Rasmijn a confirma awe mainta na NoticiaCla.com cu un peaton a wordo alcansa pa un auto na altura di ex Baby Store na Piedra Plat. Pa 4:05am, dr Mungra a constata morto di e victima, Rowald Miguel Wever (55), conoci como ex doño di funeraria Zepp Wever. Fiscal Zondervan a tuma e curpa den beslag y asina cu esaki ta cla cu investigacion, lo laga esaki liber. Posiblemente esey por sosode den curso di awe of mayan.