Pa 2025 Aruba ta spera 920 mil pasahero y 358 barco crucero

ORANJESTAD - Pa e aña aki, ta pronostica cu Aruba lo yama bonbini na 358 barco crucero y rond di 920.000 pasahero. Di e cantidad di pasahero cu lo yega, e mayoria (25%) ta cu Carnival Cruise Line, sigui pa Royal Caribbean (21.4%), Princess Cruises (10.9%), Norwegian Cruise Line (9.8%), Celebrity Cruises (8.7%), etc. Pa loke ta e cantidad di pasaheronan, na aña 2019 prome cu pandemia, tabatin 831.399 pasahero y e aña aki ta yega rond di 920.000, cu ta un crecemento impresionante. Aña pasa e industria di crucero a aporta na 133 miyon dollar den nos economia, di cual 93.70 miyon dollar tabata e parti di e pasahero mes y 8.50 miyon dollar ta bin di parti di e crew abordo. Den comparacion, Aruba ($131.05) ta na di cinco luga den Caribe pa loke e turista ta gasta na nos isla, despues di Panama ($190.61), US Virgin Island ($166.22), St. Maarten ($163.45) y St. Kitts ($145.08). Pa loke ta e loke e tripulacion ta gasta riba nos isla ($86.43), nos ta score na di dos luga, despues di St. Maarten ($117.97). Di tur e pasaheronan cu a yega Aruba aña pasa, un promedio di 83% a baha na waf y a subi nos isla.