Bapor van Amstel a tou velero Mama Lucie bek pa Aruba

ORANJESTAD – E bapor di guera Zr.Ms. Van Amstel diasabra ultimo a asisti cu e toumento di e velero belgo Mama Lucie y trece Aruba. Esaki e la haci riba peticion di Guarda Costa Caribe. Un avion dash 8 di Guarda Costa a localisa e velero algun miya pafo di Aruba y a trece tera diasabra. Ambos tripulante tabata contento cu e asistencia y mes momento hopi cansa si despues di e odisea. E velero a bandona St Maarten un luna pasa, pero su destinacion final no tabata conoci.

BIENTO FUERTE

Debi na e biento fuerte di oost, Mama Lucie no por a mantene su curso y a sufri daño na entre otro e stuur, luz y tambe e parti di cabuya. Varios bela di e velero a kibra y e ‘giek’ tambe. E motor no tabata suficiente fuerte pa nabega e velero contra mareo, bek tera. Pa ora cu van Amstel a yega serca Mama Lucie, esaki tabatin tres dia caba ta wordo ‘getou ’ pa e catamaran Nera. Pero debi na e tempo y e falta di poder di e catamaran, lo a dura por lo menos un dia mas prome cu ambos bapor por a yega Aruba. Mes momento e catamaran Nera tambe a sufri daño cu e toumento. Como tal e ayudo di van Amstel tabata masha aprecia.

ASISTENCIA

Van Amstel a presta asistencia door di manda tripulantenan di habla Frances, den un RHIB pa e velero den problema. Ora cu e tripulantenan di e velero a wordo trankilisa , a los nan di e catamaran. E catamaran a sigui su caminda pa Aruba riba propio forza despues. Van Amstel a sigui tou e velero pa Aruba.