Casi a detene arubiano di vacacion pa motibo di rijbewijs

ORANJESTAD – Por poco un ciudadano arubiano na comienso di su vakantie, a wordo deteni y encarcela na Merca pa problema cu posibel rijbewijs internacional ‘falso’. Intermediacion di oranan largo y basta problema, a bin evita e detencion. E famia awor tin cu cambia su plan, perde casi 1000 florin, pa motibo cu un otro car rental no a acepta nan rijbewijs internacional di Aruba. Problema ta cu ni cu carta di KPA, esaki no por a keda resolvi.

ROAD TRIP

Tabata den fin di siman cu a pasa cu un famia grandi arubiano a biaha pa Merca pa cuminsa cu un ‘road trip’, esta core rond den auto, pero a keda perhudica pa motibo di rijbewijs. Siendo cu nan tabatin tur documento, incluyendo carta di polis, rijbewijs internacional etc., toch esaki no a yuda. Cos a bira asina problematico, cu e personal di car rental dado momento kier a yama polis pa e persona cu e ‘rijbewijs falso’ y detene ‘pa tin un rijbewijs falso’. E persona por cierto ta un persona cu funcion halto den un departamento di gobierno na Aruba.

CAR RENTAL MERICANO

For di tempo cu tabatin problema cu rijbewijs, e famia en cuestion a dicidi cu den planeamento di nan vacacion, -pa evita problema-, a manda e car rental mericano (Alamo) un mail delanta (lesa e mail aki), pa puntra si ta acepta e rijbewijs internacional di Aruba. Hunto cu e mail, a manda un copia di e rijbewijs. E personal di e car rental a manda bisa e famia arubiano cu e rijbewijs ta ok y cu no ta problema.

RECHASO DI RIJBEWIJS

Ora cu porfin a yega e destinacion den fin di siman, a bin resulta cu e compania toch no ta acepta e rijbewijs, pasobra Aruba tin den nan log, cu ta un rijbewijs ‘roos’ ta esun oficial y no e ‘blanco’. De hecho, e persona encarga cu e car rental, kier a yama polis pa e ciudadano en cuestion, pasobra a kere cu ta usando un rijbewijs ‘blanco falsifica’, y cu e lo kier tira un ‘pará’. Ni cu e ciudadano a mustra un carta di KPA, firma pa alto comisario di polis Dolfi Richardson (lesa e carta aki) , e persona di e car rental no kier a tende. Como tal, despues di basta papiamento a evita un ‘detencion’.

PERDE PLACA

Na final di cuenta, e famia mester a ‘rearrange’ nan situacion y busca un auto mas grandi pa e famia ‘sin auto’, por a ‘fit’ den e auto. Mes momento e famia en cuestion a perde su placa (casi mil dollar) na huur auto, pasobra segun maneho di e compania, no a cumpli cu cancelacion apropia, pues no ta ‘refund’ e placa.

DOWERS

Tabata siman pasa ainda cu minister di husticia Arthur Dowers a bisa cu enberdad tin car rental na Merca cu no ta acepta rijbewijs internacional, y cu pesey ta mandando carta di polis hunto cu e rijbewijs, pa asina ‘autentica’ e documento mas ainda. Pero awor ta resulta pues cu ni asina, e no ta yuda. E persona mientrastanto a bisa cu e no tabata laat cu renobacion, sino cu simplemente for di aña pasa ora cu a renoba nan rijbewijs, nan a haya uno ‘temporal blanco’ cu nan no por haci nada cune, esta den forma di ID.   Awe nan ta perhudica na Merca pa e mesun rijbewijs.