Corte a pone fecha pa caso entre Mike De Meza vs Ministerio Publico

ORANJESTAD – Corte di prome instancia a stipula fecha pa trata e caso cu candidato pa minister, Mike de Meza a entama contra Ministerio Publico. Abogado Desiree Croes a confirma cu e fecha ta otro siman diahuebs 19 di juni pa 8’or y mei di mainta. Mester bisa mesora tambe cu e caso lo wordo trata tras di porta cera. Biaha pasa tambe ora cu a trata e caso di de Meza, pero contra DIMP, a bisa cu e lo ta tras di porta cera, pero despues a habri esaki pa publico limita. 

E CASO AKI

Manera noticiacla a raporta den forma di primicia tambe, e biaha aki, esun ‘na turno’ ta Ministerio Publico. Abogado Desiree Croes a confirma diamars atardi na noticiacla cu Ministerio Publico no a duna oido na e deadline cu a pone, algun ora prome, pues esaki tin consecuencia. ‘Jammer’, mr Croes a bisa noticiacla, como reaccion di e ‘no reaccion di OM. Consecuentemente su manese,  diaranson mainta a entama e caso. E fecha tambe ta conoci. 

DEADLINE 

Tabata mas den siman aki cu noticiacla a raporta den un primicia, de Meza su abogado a pone un deadline pa Ministerio Publico, pa informa nan di kico exacto sr de Meza ta wordo sospecha di dje. Di otro forma, lo purba forza e contesta pa medio di intervencion di un huez. Ministerio Publico, manera a spera, no a contesta y awor ta bay topa de Meza den corte. 

DI DOS CASO 

Esaki ta bira e di dos caso di de Meza pa loke ta e proceso pa e bira minister. E prome tabata contra e departamento di impuesto DIMP, pa ordena e departamento y su director pa presenta un carta di e comportacion fiscal di de Meza. Huez no a haci esaki, argumentanto cu e no ta esun pa haci esaki, y a tira e bala den scochi di premier Eman. Eman, na su turno, usando esaki como algo positivo, tabata cla pa presenta de Meza na gobernador. Te ora cu e noticia a bin, cu de Meza diripiente a bira un sospechoso di ley. Y te ainda, un siman despues cu e la haya e notificacion, e no sa di kico nan ta sospech’e. Solamente cu ta director di DIMP a entrega keho, algun siman prome. Pues ta algo cu tin di haber cu alg fiscal di de Meza. Kico, ainda de Meza no sa. Y Ministerio Publico a bisa noticiacla cu e no ta bay bisa tampoco. Por lo menos, no na noticiacla. Y awor ta parce, tampoco, na de Meza, cu ta e persona mes cu ta e sospechoso. “Ta increibel cu un "sospechoso " no ta haya sa di kico ta sospech'e. Den ki estado di derecho nos ta biba??” e abogado a comenta finalmente na noticiacla.