Minister den discusion cu e.o. AZV pa pone cierto remedi pa drumi, bek riba lista positivo

ORANJESTAD - Diaranson mainta, Minister di Salubridad Publico drs. Mervin Wyatt-Ras, a duna un splicacion detaya relaciona cu e lista positivo di AZV cu ultimamente ta den discusion. Ultimamente tin informacion eroneo cu tin varios persona cu ta haya recibo pa paga pa remedinan di drumi, siendo cu esakinan no ta kita oficialmente for di e lista positivo, mirando cu ta hibando discusion ainda riba esakinan cu e diferente instancianan.

DEN DISCUSION

Minister di Salubridad Publico Wyatt-Ras ta sigui den discusion cu Asocacion di Boticario, AZV y dunadornan di cuido pa yega na cierto criteria y norma y unabes cu keda cla cu e conseho final, por tuma decision definitivo y publica esaki pa elimina cualkier speculacion. 

Minister Wyatt-Ras tin un compromiso fuerte pa fortifica cuido medico na Aruba y duna cada ciudadano e cuido digno cu e tin derecho riba dje. Cuido medico di calidad ta un derecho fundamental di nos tur y esaki ta netamente e enfoke di Minister Wyatt-Ras.

LISTA POSITIVO

Tabata apenas despues di 1 luna den Gobernacion, Gabinete AVP-Futuro, a pone 129 remedi bek riba e lista aki. Total 92 remedi no a bolbe riba e lista positivo mirando cu sea e compania farmaceutico mundialmente a stop di traha esakinan of cu Adviescommissie Geneesmiddelen Aruba ta considera esakinan como remedinan adictivo pa por ehempel drumi. Den cuadro di e maneho preventivo, ta prudente pa ta cauteloso cu duna remedinan cu tin riesgo di adiccion, mirando cu esaki lo crea otro problemanan di salud pa e pashentnan.