Bermudez: Noticia di su retiro pa motibo di salud of CFT no ta berdad!

ORANJESTAD – Rumornan cu minister di finanza Angel Bermudez lo a entrega of ta pensa pa entrega su retiro, a keda desmenti awe mainta pa e mandatario mes na NoticiaCla.com. E prome informacion ta cu e lo a bay of kier entrega su retiro debi na salud, pero cu e motibo real ta su desatisfaccion pa un carta cu e la ricibi diabierna mainta di College Financieel Toezicht (CFT). “Ningun di dos ta berdad” Bermudez a sigura NoticiaCla.com awemainta. Pues otro intento pa crea problema y polemica, unda cu supuestamente no tin.

RUMOR

For di diabierna e rumor a plama y poco poco e tabata haya mas atencion. E prome informacion tabata cu e ta retira debi na problema cu salud. Despues esey a bira un ‘excuse’ pa tapa e motibo real, cu ta su desacuerdo cu un carta cu CFT. Ta berdad cu Bermudez no ta di acuerdo cu e forma con CFT kier ‘bulldoze’ cierto recomendacionnan y comberti nan unilaterlamente como un medida. Mientras cu hopi biaha Bermudez a bisa cu e no ta di acuerdo cu esey, ‘e ta respeta CFT mescos cu cualkier otro organo, y lo tuma loke por y wanta afo, loke no por. Pero e parti di carta cu e lo a haya, no ta cuadra tampoco. E ultimo carta cu Bermudez a haya di CFT, tabata esun di 4 di juni y esey a wordo trata caba, y reacciona ariba caba.