Fraccion AVP ta desaproba metemento Glenbert Croes den asunto otro pais

ORANJESTAD – Un dia despues cu parlamentario di MEP, Glenbert Croes a wordo cita den prensa venezolano riba e conflicto cu Guyana, fraccion di AVP a reacciona. Den un comunicado, Rene Herde ta mustra cu fraccion di AVP a tuma nota di e expresionnan haci na Venezuela door di Glenbert Croes tocante di e conflicto teritorial entre Republica Bolivariana di Venezuela y Republica Cooperativo di Guayana. For di medionan di comunicacion Venezolano por conclui cu Croes lo a bisa di ta papia den nomber di gobierno di Aruba. E expresionnan ademas a wordo interpreta comosifuera e pais Aruba ta involucra su mes den e conflicto entre e dos paisnan. Esakinan ta dos punto cu fraccion di AVP mester desaproba.

NO METE DEN ASUNTO DI OTRO

Herde ta sigui mustra cu ‘fraccion di AVP a y semper lo mantene e posicion di no mete den asuntonan interno di otro paisnan. Cu su expresionnan sr. Glenbert Croes a mete den asunto di otro paisnan. Aruba no sa mete den asuntonan di otro paisnan. Aruba no kier pa otro mete den nos asunto tampoco. Aruba a y semper lo mantene bon relacion cu tur pais, basa riba respet mutuo y di acuerdo cu ley internacional. Sigur cu nos paisnan bisiña’.

REACCION GLENBERT CROES RIBA SU PROPIO DECLARACION

Tabata diahuebs cu Croes mes a reacciona riba e declaracionan haci y e atencion cu e la haya.  “Mi ta riba un mision priva. Mi a biaha como ciudadano. Mi no a biaha como parlamentario of diplomatico pa Venezuela”. Asina parlamentario pa fraccion di MEP Glenbert Croes a sigura NoticiaCla.com diahuebs merdia. E ta refuta asina cu e la haci declaracionnan riba nivel ‘diplomatico’ na nomber di pais Aruba, riba e tema controversial di ‘Essequibo’ e siman aki. Essequibo ta e pida tereno entre Venezuela y Guyana, cu pa basta aña a wordo disputa. Un corant venezolano a cita Croes bisando cu ‘na nomber di e pueblo di Aruba’, e ta sostene Venezuela den e causa aki”. Croes ta sigura cu nan a saca su declaracion for di contexto, un biaha mas.