De Meza: Tin un team cla caba pa ora e bira minister, e ‘hit the ground running’

DEN HAAG – Parlamentario Mike de Meza ta cla pa asumi su rol como e proximo minister. Asina por a compronde di dje, for di un prome reaccion duna den e programa Enfoke diaranson merdia for di Hulanda. E parlamentario ta na Hulanda pa entierro di su ruman grandi, y a bisa cu e la tuma nota di e sentencia. E la compronde for di e sentencia cu no tin nada pa wante bek mas. Ora cu a punter si e ta cla, e la sigura cu e ta cla cu un team pa cada cartera cu e lo tin cu representa, esta di infrastructura, energia y mas. Segun e parlamentario, e tin un team di experto cu ta consisti di ingeniero, y experto riba tur e otro terenonan y a duna un indicacion di kico por spera di dje. E la haci mencion di e cambionan cu tin cu bin den DIP, e parti di bubali plas, investigacion riba e contracto di Eagle LNG, e contractonan increibel na WEB y mucho mas. Pues, cu e tin un plan cla caba pa e ‘hit the ground running’.

SENTENCIA 

E la mustra cu e ta contento cu e sentencia, den sentido cu huez a confirma loke cu tur tabata sa caba, cu e la cumpli cu pagonan pendiente, y cu e no tin ningun debe na impuesto. E ta lamenta cu oposicion a bin cu storia cu e lo ta debe 2 miyon florin, y ta considera tur esaki locura completo. 

DIALUNA TA IMPORTANTE

E la confirma cu e lo yega Aruba bek diadomingo pa dialuna e reuni cu prome minister Eman, unda cu e lo presenta su documentacion y unda cu ta spera cu nan lo por keda cla pa e por accepta e funcion y asina prome minister Mike Eman presente na gobernador di Aruba como e proximo minister.