Mike Eman cla pa presenta de Meza como e siguiente minister

ORANJESTAD – Tur cos ta cla pa prome minister Mike Eman presenta candidato minister Mike de Meza na gobernador di Aruba proximamente como e siguiente minister di su gabinete.  Despues di e sentencia di huez diaranson mainta di e caso cu Mike de Meza a entama contra Departamento di Impuesto (DIMP), prome minister Mike Eman a duna como reaccion cu e lo reuni cu de Meza awor dialuna pa e siguiente fase. Mientras cu e no a bisa esaki den e palabranan exacto, e ta implica cu e reunion ta uno mescos cu e la tene cu tur otro candidato minister, y despues ta e ta presenta de Meza como candidato minister na gobernador di Aruba, SE Alfonso Boekhoudt. 

E BASE PA SU DECISION

Si sr Eman tabatin duda den e proceso pa postula de Meza como minister, e ta bisa cu segun e sentencia di awe mainta, aunke cu huez no a bisa ken tin cu bira minister, cu e la haya suficiente indicacion kico pa haci. “Huez a bisa cu repasando tur cos na e momentonan aki, e ta mira cu e siguiente paso cu mester wordo tuma, ta den man di e minister president cu ta e formador” Eman a cuminsa na bisa. E la sigura cu e la repasa e veredicto. “Pami ta hopi obvio cu e siguiente paso cu mi tin cu tuma, ta locual a wordo haci cu tur otro colega ministernan, cu nos a entrega nan documentacion na gobernador”. E la informa tambe cu e lo invita sr de Meza pa un combersacion cu lo tuma lugar dialuna awor, repasa tur su dossier, y despues lo tuma e siguiente paso. E no a usa e palabranan cu e lo presenta de Meza e ora, pero esaki ta e indicacion si. 

CLARIDAD

Sr Eman a admiti cu e veredicto no a duna tur e claridad cu tur hende lo a desea. “Un parti importante di e dossier aki ta accentua cu sr de Meza a cumpli cu tur su debernan di belasting. E ta bisa tambe ‘dit werkt in het voordeel di sr de Meza”.  Scuchando sr Eman, e ta mustra cu esaki ta suficiente pa postula de Meza pa minister awor si. Ta keda awor na gobernador, si e ta firma e acuerdo aki. 

LOKE CU EMAN NO A BISA

Interesante di tur esaki ta cu, mientras cu sr Eman ta menciona e parti di sentencia cu ta cumbini sr de Meza, e la laga afo, e parti cu no ta cumbini sr de Meza y como tal no cita e pida unda cu ta bisa cu e director di DIMP tin reserva riba e comportacion fiscal di De Meza den pasado, en particular riba De Meza su fayo ripiti pa cumpli cu e obligacion di declaracion di impuesto. Ademas, cu e director ta kere cu De Meza ta moralmente y eticamente obliga pa toch paga un pendiente debe di impuesto, aunke cu e debe ey no por wordo cobra mas pa motibo di verjaring. “Esey no ta papia na fabor di De Meza”, huez ta bisa den su sentencia, pero sr Eman no a menciona e parti aki si den su reaccion. Ta keda pendiente pa ora cu e proceso continua, y wak kico ta pasa awor ora cu sr de Meza wordo postula como e minister cu falta pa gabinete AVP-FUTURO ta completo.