KPA: E di tres morto di trafico ta un colombiano di 23 aña

ORANJESTAD – E di tres victima di trafico pa 2025 pa Aruba, ta un colombiano di 23 aña, Pedro Manuel Ochoa Gutierrez. E vocero di polis Liliana Rasmijn a divulga e nomber despues cu a logra notifica famianan na Aruba. Mas prome, Noticiacla a raporta di e accidente aki caba, cu a tuma lugar mainta tempran 8’or y mei na altura di Grapefield patras di KIA. 

E CASO

Central di Polis a despacha patruya , ambulance y tambe departamento di trafico.  Na yegada di e patruya ta bin topa cu un pick up Nissan color Shinishi cu tres hende homber envolvi. Un di nan tabata mustra basta grave na unda cu na yegada di ambulance a dune asistencia  medico pero lamentablemente no por a haci nada mas pe. Esey tabata esun cu a keda registra como e di tres morto. Na e sitio di sucedido a presenta hefe di trafico, altocomisario Arnhem y Slachtofferhulp.  Departamento di Trafico ta haciendo su investigacion pa sa kico exactamente a pasa. 

OTRO VICTIMANAN

E dos otro victimanan den e pick-up a wordo transporta pa ambulance mirando cu nan tabata levemente herida.