Chauffeurnan di autobus kier aumento di tarifa

ORANJESTAD – E chauffeurnan di autobus na Aruba tin varios precupacion cu nan a presenta e siman aki na minister di transporte Otmar Oduber. Entre otro e aumento pidi pa tarifa, y e situacion di stacionamento di nan busnan. No ta un secreto cu e situacion den nos centro di ciudad specificamente e stacionamento dilanti di e edificio di “Doña Clara”, no ta esun mas organisa na e momentonan aki.

ACOMODACION PA BUSNAN

Minister Otmar Oduber a menciona cu ta evaluando con pa acomoda e busnan pa por cumpli cu nan demanda. Un ehempel lo ta pa re ubica nan den espacionan defini den e mesun area pa den un forma mas organisa cada districto ta haya nan propio espacio. Pa locual ta trata e situacion na San Nicolas, mientrastanto ta haciendo uso di e espacio di parkeo di Carnival Village tanten cu no tin niun evento. Esnan di Noord kier purba keda mas serca posibel di unda nan ta ubica na e momento aki.

INFRASTRUCTURA

Papiando di infrastructura, un otro topico ta e posibilidad pa crea un facilidad pa e chauffeurnan. Nan lo desea un facilidad cu por brinda baño y un poco sobra. Esaki lo tuma su tempo pero durante di reunion a surgi algun idea cu a corto plazo lo por alivia e falta di un espacio adecuado pa e chauffeurnan.

AUMENTO TARIFA

Pa e ultimo 8 añanan e tarifa di autobus ta 2.50 Florin. A yega e momento segun e chauffeurnan, pa aumenta esaki. Nan a pidi Minister Oduber, cu na su turno ta evaluando e idea di e cambio di tarifa. E chauffeurnan kier mira un aumento di 1 Florin. E mandatario ta splica “Mi sa cu pa e ultimo añanan e tarifa aki ta uno defini y segun e mandatario, no por aumenta esaki na 3,50 florin sin mas ya cu esaki mester cana su caminda legal.”