Magic 96.5 FM ta transmiti UEFA Women’s Euro 2025

ORANJESTAD - Magic 96.5 FM dialuna a anuncia cu e stacion lo brinda cobertura intensivo y vibrante di e UEFA Women’s Euro 2025, cu lo tuma luga for di 2 te 27 di juli na Suisa. E campeonato ta su 14e edicion y ta un di e evento deportivo mas prestigioso den Europa pa seleccionnan femenino.

Pa ta na e altura di un torneo internacional di e magnitud aki, Magic a forma un ekipo   di comentarista y analista local cu un pasion genuino pa futbol. Liderando e cobertura ta   Cadochi Kock, acompaña pa Devin de Veer y Arianne Westerburger, kende nan conocemento y estilo fresco ta trece un dinamismo nobo na e transmision.

Erin Croes, directora di Magic FM, ta expresa su orguyo: “Pa nos, e cobertura di UEFA Women’s Euro 2025 ta mas cu simplemente transmiti wega – nos ta duna visibilidad y plataforma na deporte femenino. Nos ta kere den poder di representacion y e inspiracion cu esaki por duna na atleta y fanatico, pero particularmente na nos mucha y hobennan.”