Fitch Ratings a upgrade Aruba pa BBB-, y perspectiva positivo

NEW YORK - Fitch Ratings a upgrade  Aruba su rating pa BBB-, for di BB+ di aña pasa, y cu un perspectiva positivo. Segun e instancia mericano, esaki ta reflehá progreso signifikante den reduccion di debe di gobierno, sostene pa surplusnan fiscal halto y gobernacion fuerte. “Economia di Aruba, impulsa pa turismo, a crece cu 6.8% na 2024, cu un crecemento den futuro cual nos ta spera di modera”. E cuadro fiscal segun Fitch, fortalece pa sosten di Hulanda, ta inclui metanan pa surplus presupuestario y reduccion di debe. E surplusnan di cuenta coriente di Aruba y e aumento di e reservanan internacional ta reforsa su stabilidad financiero. “Sinembargo, nivelnan halto di debe y dependencia economico riba turismo ta trece riesgonan”.  

Gobierno di Aruba a reacciona y minister Geoffrey Wever responsabel pa economia y finanzas, ta reconoce e importancia di e resultado di e rapport como un confirmacion di e strategia cu Aruba a implementa pa stabilidad structural. “E reconocimento di Fitch ta un validacion di nos compromiso cu transparencia, control fiscal, y desaroyo sostenibel. Nos ta riba e caminda correcto, pero nos ta consciente cu tin mas trabou pa haci pa fortalece nos resistencia contra desafionan externo,” Minister Wever a declara.