Daño causa pa candela den cushina na Marina Pirata ta considerable

BALASHI – Un candela grandi den su cushina diabierna anochi, a pone cu e conocido restaurant Marina Pirata, mester cera su porta pa por lo menos dos siman. E candela diabierna anochi a cuminsa y keda den cushina, y a haci ‘considerable daño’ segun e restaurant a confirma diasabra atardi segun un mensahe riba nan pagina di Facebook. ‘No obstante tur esfuerso pa contene esaki’, e compania ta bisa, di e candela cu nan no a logra domina den e cushina. Asina mes, nan ta contento cu e candela a keda den e cushina y no expande pa mas parti di e restaurant. “Lo tuma nos un tempo pa recupera di e esaki, mientras cu nos ta cuminsa e proceso pa repara e daño”. Ademas a gradici tur hende cu a contribui pa yuda den un forma of otro durante e caso diabierna anochi pa combati e candela.