Tur director di ATA di area ta na Aruba trahando riba strategia pa otro aña

ORANJESTAD - E siman aki, Aruba Tourism Authority (A.T.A.) ta teniendo su reunionnan pa cu 2026, durante sesionnan special den cual gerencia y ehecutivonan local y internacional incluyendo tur e directornan di tanto e continente Norte Americano, esun di Latino America y esun di Europa, ta na Aruba pa tambe participa y yuda den crea plannan concreto di con lo desaroya tur e mercadonan turistico di nos pais. “E locual cu bo ta mira awe den ehecucion, a pens’e y discutie un of dos aña pasa caba. Asina nos ta traha, basa riba datonan concreto cu ta guia e organisacion den e rumbo corecto”, asina Ronella Croes, Chief Executive Officer di A.T.A. a indica a base di reunionnan intenso, cu a start for di mainta te den oranan lat di atardi y a cubri algun dia.

E sesionnan a cuminsa desde dialuna caba y a sigui durante dos dia te cu diaranson atardi. Obhetivo di e encuentro strategico aki, cu ta organisa anualmente, ta pa refina y alinia prioridadnan clave y areanan di enfoke strategico pa e resto di aña 2025 y pa aña 2026.

Pa medio di dialogo y colaboracion, ta identifica entre otro areanan di prioridad clave y defini e precondicionnan pa nan ehecucion exitoso. E resultadonan di e sesion aki lo sirbi como base pa yega na e Plan Corporativo 2026, cu sin duda lo contene e ideanan cu sali despues di e reunionnan. Punto di salida di A.T.A. ta cu e maneho den e temponan nos dilanti mester contene elementonan cu ta resalta e berdadero dinamica di e industria di turismo di Aruba door di cambia di narativonan di pasado basa riba datonan cu ta refleha e impacto economico, social y ambiental real di nos isla.

Pa loke ta trata e areanan specifico, manera ta Norte America, Latino America y Europa, A.T.A. ta enfoca den compronde e situacion geopolitico y e impacto cu e lo por tin riba biahamento den aña 2025 y na mes momento repasa y revisa e pronostico y proyeccionnan pa aña 2026. Tambe ta defini suposicionnan strategico pa aña 2026, con e enfoke strategico pa aña 2026 lo ta y den esey resalta loke ta diferente.

“Mi ta orguyoso di e ekipo dinamico, profesional y pasiona pa nos isla, cu ta traha cu alma y curason, tur dia, pa progreso y bienestar di e industria turistico di nos pais. Ta Rubianonan cu ta fungi como e helicopter view di nos economia, door di percura pa un industria turistico floreciente, cu ta impacta henter nos economia na un forma positivo”, asina Ronella Croes a categorisa su coleganan. El a sigura cu, e exito di desaroyo y e forma solido cu Aruba ta posiciona awendia den Caribe y na nivel mundial den turismo, ta danki na cada un di e coleganan aki, cu no ta yega A.T.A. tur dia pa traha, sino pa carga e economia di nos pais den nan mesun mannan! Reconociendo tambe retonan y trahando duro riba esakinan!