Recordando victimanan di buelo MH17

ORANJESTAD – Awe mayoria (si no ta tur) oficina di gobierno, gobernador y VNO a lanta cu bandera halfstok. Motibo di esaki ta cu awe ta recorda un aña pasa cu 193 hulandes (di un total di 298 victima) a muri den e accidente aereo di buelo MH 17 na Ukraine. Como tal, gobierno di Reino a proclama pa tur pais den Reino pone bandera halfstok. Fuera di Hulanda, Aruba, Corsou y St Maarten tambe a duna oido na e peticion aki.

ACCIDENTE AEREO

Tabata un aña pasa cu e noticia tragico a drenta cu un avion di Malaysia Airlines a wordo derumba pa gruponan di persona na Ukraine. E buelo tabata uno comercial yena cu pasaheronan cla pa pasa nan vacacion. Di e total di 298 pasahero, tabatin 193 hulandes (e mayoria), 43 di Malaysia, y 39 australiano. E tabata un temporada duro pa Reino Hulandes, cu a pone cu henter e verano y comienso di invierno, a gara primordialmente atencion di Hulanda.

TRIBUNAL INTERNACIONAL

Un aña despues, varios pais envolvi, ta bringando pa husticia awor, den forma di un tribunal pa trece esnan culpabel dilanti mesa berde internacional. Hulanda ta un di e paisnan cu ta bogando pa un tribunal, sosteni pa Nacionnan Uni. Pero mirando cu e por bira un conflicto cu Russia (cu ta wordo tilda di a sostene rebeldenan cu lo a derumba e avion), Russia por veto e idea aki. Como tal no ta descarta cu lo por tin un tribunal internacional sin sosten di Nacionnan Uni.