No a papia na nomber di Aruba riba tema controversial

ORANJESTAD – “Mi ta riba un mision priva. Mi a biaha como ciudadano. Mi no a biaha como parlamentario of diplomatico pa Venezuela”. Asina parlamentario pa fraccion di MEP Glenbert Croes a sigura NoticiaCla.com diahuebs merdia. E ta refuta asina cu e la haci declaracionnan riba nivel ‘diplomatico’ na nomber di pais Aruba, riba e tema controversial di ‘Essequibo’ e siman aki. Essequibo ta e pida tereno entre Venezuela y Guyana, cu pa basta aña a wordo disputa. Un corant venezolano a cita Croes bisando cu ‘na nomber di e pueblo di Aruba’, e ta sostene Venezuela den e causa aki”. Croes ta sigura cu nan a saca su declaracion for di contexto, un biaha mas.

BISHITA PA VENEZUELA

E siman aki e la biaha pa Venezuela, pa participa den un ronda di combersacion cu varios politico, den e afan pa convence nan pa laga e compania petrolero PDVSA bin Aruba y posiblemente participa den un compra di e refineria Valero na Aruba. TA durante e bishita aki, cu e la wordo acerca pa e canal di television parlamentario ANTV, riba e tema trata diamars ultimo. Aki e la duna un declaracion pero, -cu segun e parlamentario-, tabata uno puro a ‘titre personal’ y no como un parlamentario. E la sigura cu e no a papia na nomber di fraccion di MEP, of gobierno di Aruba of cualkier otro forma oficial.

SITUACION DI ESSEQUIBO

Motibo cu a ‘involucra’ Croes den e tema, segun e parlamentario, ta pasobra Aruba tabata conoci cu Exxon den añanan 60 pa 80 cu operacion di LAGO. Aworaki e mesun Exxon ta den un disputa pa exploracion di petrolio den e teritorio di disputa. Loke cu Croes a declara, ta cu e ta ‘solidario cu e esfuerso cu ta wordo haci pa entre dos pais resolve e asunto’. “Den ningun forma mi ta papia ni na parlamento di Aruba, den nomber di fraccion di MEP. Mi no ta papia den nomber di partido MEP” Croes a sigui bisa.

E ta corda cu recientemente e la haye den ‘awa cayente’ caba ora cu e la declara tambe su ‘solidarismo’ den e asunto di conflicto entre Obama (presidente di Merca) y Maduro (presidente di Venezuela). Venezuela a exigi un rectificacion di Merca, y Croes e tempo ey durante un bishita na Consulado venezolano, a haci un declaracion di sosten. E declaracion ey a wordo mal interpreta pa autoridad diplomatico na Aruba y Hulanda.